Është vetëm 19-vjeç por talenti i tij nuk vihet në diskutim dhe me të drejtë emri i Donis Avdijajt është përmendur shumë në media gjatë dy viteve të fundit, kjo për vetë faktin se lojtari ishte në mëdyshje se cilën kombëtare duhet të zgjidhte mes Shqipërisë dhe Gjermanisë.
Gjithsesi tashmë dilemat kanë marrë fund dhe për të rinkonfirmuar, vendimin që mori disa muaj më parë ka mjaftuar një tjetër deklaratë e Donis Avdijajt.
Në prag të ndeshjes miqësore mes Austrisë dhe Shqipërisë i intervistuar nga gazeta austriake DerStandart, sulmuesi në pronësi të klubit gjerman Schalke 04 por që për momentin luan i huazuar te Sturmi i Grazit nënvizoi se tashmë ka marrë një vendim përfundimtar.
“Do të luaj për Shqipërinë nëse kombëtarja kuqezi do të ketë nevojë për mua. Të përfaqësoj fanellën kuqezi është një nder për mua. Ata dëshironin një përgjigje nga unë dhe unë dua tu them që jam në dispozicion të federatës shqiptare të futbollit, theksoi Donis Avidjaj.
Më tej 19-vjeçari shtoi:” Natyrisht që do të më pëlqente të isha pjesë e Shqipërisë në Euro 2016, por besoj se kjo nuk do të jetë e mundur pasi të them të vërtetën lojtarët që e kualifikuan kombëtaren kuqezi në Europianin francez e meritojnë shumë më tepër se unë të jenë pjesë e atij evenimenti “.
Shpresoj të jem pjesë e Shqipërisë në kualifikueset e Botërorit Rusi 2018. Me këto fjalë përfundoi deklaratën e tij për gazetën Der Standart, Donis Avdijaj. Futbollisti shqiptar për të dytin sezonin është pjesë e Sturmit të Grazit në kampionatin austriak.
