Mungesa e planifikimit të mirëfilltë të kontratës për ndërtimin e Palestrës Multisportive në Podujevë ka bërë që vlera e parashikuar e projektit të jetë dukshëm më e ulët se çmimi me të cilin është dhënë kontrata. Komuna e Podujevës kishte parashikuar 3.5 milionë euro për këtë projekt, ndërsa kontrata është dhënë për 4 milionë e 777 mijë e 777 euro, duke krijuar një diferencë prej 1 milion e 277 mijë e 777 eurosh, raporton Infosot.
Në njoftimin fillestar për këtë aktivitet të prokurimit, Komuna e Podujevës, e cila drejtohet nga Shpejtim Bulliqi, e kishte përcaktuar vlerën e parashikuar të kontratës në 3.5 milionë euro. Mirëpo, pas zhvillimit të procedurës, kontrata është dhënë me vlerë prej 4,777,777.39 euro, apo rreth 36.5 për qind më shumë sesa shuma e parashikuar në fillim.
Bëhet fjalë për projektin “Ndërtimi i Palestrës Multisportive në Komunën e Podujevës”, për të cilin autoriteti kontraktues ka zhvilluar procedurë të hapur të prokurimit, ndërsa kriteri për dhënien e kontratës ka qenë çmimi më i ulët.
Sipas njoftimit zyrtar për dhënien e kontratës, të përgatitur më 13 gusht 2026, kontrata i është dhënë grupit të operatorëve ekonomikë NNT BINI SH.P.K., ILEAA-GR SH.P.K. dhe EING COM SH.P.K. Vlera e përgjithshme e kontratës është përcaktuar në 4,777,777.39 euro.
Në procedurë janë pranuar gjithsej tre tenderë. Dokumenti zyrtar tregon se oferta e grupit që ka fituar kontratën, në vlerë prej 4,777,777.39 euro, është edhe tenderi i përgjegjshëm me çmimin më të ulët dhe tenderi i përgjegjshëm me çmimin më të lartë.
Kështu, nga vlera e parashikuar prej 3.5 milionë eurosh deri te vlera përfundimtare e kontratës prej rreth 4.78 milionë eurosh, diferenca është 1,277,777.39 euro. Në përqindje, kjo paraqet një rritje prej rreth 36.5 për qind krahasuar me shumën që Komuna e Podujevës kishte parashikuar në nisje të aktivitetit të prokurimit.
Në dokumentacionin e publikuar për këtë kontratë figurojnë edhe tri njoftime për korrigjimin e gabimeve në njoftimin e kontratës, të publikuara më 28 prill, 18 maj dhe 22 maj 2026, ndërsa njoftimi fillestar për kontratën ishte publikuar më 22 prill 2026.
Sipas Ligjit për Prokurimin Publik, planifikimi i prokurimit dhe përcaktimi i nevojave janë pjesë e rëndësishme e procesit përpara inicimit të një aktiviteti të prokurimit. Autoriteti kontraktues duhet të planifikojë prokurimet në përputhje me nevojat dhe mundësitë buxhetore dhe të përcaktojë vlerën e parashikuar të kontratës mbi bazën e një vlerësimi të arsyeshëm të kostos së projektit.
Në rastin e palestrës multisportive në Podujevë, dokumentet e prokurimit tregojnë se vlera e parashikuar ishte 3.5 milionë euro, ndërsa oferta fituese ka arritur në 4.77 milionë euro. Kjo e vendos projektin mbi vlerën e parashikuar fillimisht për më shumë se 1.27 milionë euro.
