Drita do të mundohet ta sigurojë fazën e “play-off”-it të Ligës së Konferencës sonte.
Kampionia e Kosovës javën e kaluar e bëri një hap të madh drejt kualifikimit në këtë fazë.
Bardhekaltrit e mposhtën ekipin Tre Fiori në udhëtim me rezultat 4:1 në ndeshjen e parë të rrethit të tretë kualifikues.
Kështu, gjilanasit do ta kërkojnë konfirmimin në ndeshjen e kthimit që do të luhet sonte për t’iu afruar edhe më shumë fazës së ligës në këtë garë.
Në lojën e parë, gjilanasit i siguruan golat vetëm në pjesën e dytë, ku ishin të jashtëzakonshëm në “San Marino Stadium Serravalle” të San Marinos.
Besnik Krasniqi i kishte shënuar dy gola për ekipin e Visar Sermaxhajt në minutat e fundit, ndërsa nga një e kishin shtuar Raddy Ovouka dhe Blerim Krasniqi.
Drita është e vetmja skuadër kosovare e mbetur ende në lojë në garat evropiane.
Gjilanasit synojnë ta prekin fazën e ligës në Ligën e Konferencës, njëjtë si vitin e kaluar dhe të shkojnë sa më larg në këtë kompeticion.
Ndeshja mes Dritës dhe Tre Fiori do të luhet sonte në stadiumin “Fadil Vokrri” në Prishtinë duke filluar nga ora 20:00.
