Zyra e Presidentes së Kosovës ka hapur procedurë prokurimi për sigurimin e rreth 700 biletave të udhëtimit me aeroplan, për një periudhë prej 36 muajsh, me vlerë të parashikuar të kontratës prej 400 mijë euro, raporton Infosot.
Sipas njoftimit për kontratë të publikuar më 27 gusht 2026, bëhet fjalë për “Shërbime të transportit ajror – bileta”, ndërsa në dokument specifikohet se biletat do të sigurohen për nevojat e Zyrës së Presidentes së Republikës së Kosovës.
Në njoftim thuhet se relacionet e udhëtimeve nuk mund të definohen paraprakisht, ndërsa kontrata do të jetë kontratë publike kornizë me një operator ekonomik dhe do të ketë kohëzgjatje prej 36 muajsh.
Sasia e paraparë është rreth 700 bileta udhëtimi me aeroplan, ndërsa vlera e parashikuar e kontratës është 400 mijë euro.
Nëse 700 biletat ndahen në mënyrë të barabartë përgjatë 36 muajve, kjo i bie mesatarisht rreth 19.4 bileta në muaj, ose rreth 233 bileta në vit. E shprehur në ditë, bëhet fjalë për një biletë mesatarisht çdo 1.54 ditë gjatë gjithë periudhës së kontratës.
Nga vlera e parashikuar e kontratës, çmimi mesatar i llogaritur për një biletë do të ishte rreth 571 euro.
Në total, shpenzimi mesatar i paraparë do të ishte rreth 11 mijë e 111 euro në muaj, apo rreth 133 mijë euro në vit.
Dokumenti nuk përcakton se sa prej këtyre biletave do të përdoren nga Presidentja dhe sa nga zyrtarë apo pjesëtarë të tjerë të Zyrës së Presidentes. Në të thuhet vetëm se shërbimet janë për nevojat e Zyrës së Presidentes.
Tenderi do të zhvillohet përmes procedurës së hapur, ndërsa kriter për dhënien e kontratës është çmimi më i ulët. Afati i fundit për dorëzimin e ofertave është 9 tetor 2026, në ora 14:00.
Operatori ekonomik që do të marrë pjesë në tender duhet, ndër të tjera, të ketë qarkullim prej së paku 600 mijë eurosh në tri vitet e fundit dhe të ketë përfunduar kontrata të ngjashme në vlerë prej së paku 600 mijë eurosh. Po ashtu, kërkohet që operatori të ketë të paktën tre punëtorë të kualifikuar nga Asociacioni Ndërkombëtar i Transportit Ajror (IATA) dhe qasje në sisteme të rezervimit të biletave si Amadeus, Galileo ose Sabre.
Për këtë kontratë, Presidenca ka paraparë edhe 12 mijë euro si siguri të tenderit, ndërsa siguria e ekzekutimit është përcaktuar në 10 për qind të vlerës së kontratës.
B05 Njoftim per Kontrat (Dokument)
