40 milionë euro është shuma që, sipas vendimit të Gjykatës Komerciale të Kosovës, Dhomat e Shkallës së Parë, që KESCO do të detyrohet t’ia paguajë Korporatës Energjetike të Kosovës (KEK), në kuadër të një kontesti për mos përmbushje të obligimeve për faturat e energjisë elektrike për periudhën janar, shkurt dhe mars 2025, raporton Infosot.
Gjykata ka refuzuar si të pabazuar prapësimin e KESCO-s ndaj urdhrit përmbarimor të lëshuar më herët, duke lënë në fuqi vendimin për ekzekutimin e pagesës në bazë të faturave të paraqitura si dokumente të besueshme.
Sipas vendimit, përmbarimi është lejuar mbi bazën e tre faturave të energjisë elektrike, të cilat gjykata i ka vlerësuar si të rregullta dhe të vlefshme për ekzekutim. Në arsyetimin e saj, gjykata thekson se faturat përmbushin kushtet ligjore, pasi përmbajnë të dhënat e palëve, sasinë e energjisë së furnizuar, çmimin dhe afatet e pagesës, si dhe janë pranuar nga debitori përmes mekanizmave të brendshëm të kompanisë.
KESCO kishte kundërshtuar urdhrin përmbarimor duke pretenduar se dokumentet mbi të cilat është bazuar kërkesa nuk janë të vlefshme dhe se komunikimet elektronike dhe pranimi i tyre nuk përfaqësojnë detyrim juridik. Po ashtu, kompania kishte kërkuar ekspertizë teknike dhe grafologjike për të vërtetuar autenticitetin e dokumenteve dhe komunikimeve.
Megjithatë, gjykata i ka hedhur poshtë këto pretendime, duke vlerësuar se komunikimet elektronike dhe procesi i konfirmimit të të dhënave përmes zyrtarëve të kompanisë dëshmojnë dijeninë dhe dakordimin paraprak për furnizimin dhe çmimin e energjisë. Sipas gjykatës, këto elemente e bëjnë faturën dokument të besueshëm dhe të përmbarueshëm.
Gjykata ka konstatuar gjithashtu se KESCO nuk ka ofruar prova të mjaftueshme për të mbështetur pretendimet e saj dhe nuk ka iniciuar procedura të tjera ligjore për të kundërshtuar autenticitetin e dokumenteve të pretenduara.
Në vendim theksohet se urdhri përmbarimor mbetet në fuqi dhe se prapësimi i KESCO-s refuzohet në tërësi, duke i hapur rrugë ekzekutimit të detyrimit financiar ndaj KEK-ut.
Vendimi i gjykatës së shkallës së parë mund të ankimohet në Dhomën e Shkallës së Dytë të Gjykatës Komerciale të Kosovës brenda afatit ligjor prej shtatë ditësh.
Gjykata Komerciale, aktygjykimi KESCO vs KEK (Dokument)
