Deputeti i Partisë Demokratike të Kosovës (PDK), Përparim Gruda, ka reaguar pas kthimit për rishqyrtim në Kuvend të Ligjit për ndryshimin e Ligjit për Dhomat e Specializuara dhe Zyrën e Prokurorit të Specializuar, duke thënë se ligji nuk përmban asnjë gabim.
Gruda, përmes një reagimi, ka deklaruar se është krenar për punën që ka bërë së bashku me ekipin që e ka hartuar ligjin, për të cilin thotë se është konsultuar me të gjithë akterët përkatës.
“Ligji për ndryshimin e Ligjit për Dhomat e Specializuara nuk ka asnjë gabim. Asnjë. Jam krenar për punën që kam bërë, bashkë me ekipin me të cilin e kemi hartuar këtë ligj. Është konsultuar me këdo që është dashur të konsultohet”, ka shkruar Gruda.
Ai ka theksuar se qëndron prapa përmbajtjes së ligjit dhe punës së bërë gjatë hartimit të tij, duke thënë se nuk do të tërhiqet nga bindjet e tij.
“Unë qëndroj sot, dhe do të qëndroj deri në fund, prapa çdo shkronje të këtij ligji. E di sa punë, sa përpjekje dhe sa përgjegjësi ka pasur pas tij”, ka deklaruar deputeti i PDK-së.
Gruda ka thënë se do të kishte preferuar që vëmendja të ishte te zbatimi i ligjit dhe jo te rihapja e debatit për të. Megjithatë, ai ka vlerësuar se nëse Kuvendi e rishqyrton atë, procesi duhet të zhvillohet mbi argumente juridike.
“Do të kisha preferuar që sot të flisnim për zbatimin e ligjit, jo për rihapjen e debatit mbi të. Megjithatë, nëse Kuvendi e rishqyrton, kjo duhet të bëhet me përgjegjësi, me argumente juridike dhe me vendosmëri për ta ruajtur thelbin e tij”, ka shkruar ai.
Deputeti ka përsëritur se nuk do të distancohet nga puna e tij në hartimin e ligjit, ndërsa ka thënë se qëllimi duhet të jetë drejtësia e pavarur dhe mbrojtja e luftës çlirimtare.
“Unë nuk tërhiqem nga bindja ime, nuk distancohem nga puna ime dhe nuk heq dorë nga qëllimi për të cilin ky ligj u hartua. Çdo hap i mëtejshëm duhet të na afrojë drejt një drejtësie të pavarur që e mbron luftën tonë të drejtë çlirimtare, jo të na largojë prej saj”, ka theksuar Gruda.
Në fund të reagimit, ai ka lënë të hapur mundësinë për të folur më gjerësisht për këtë çështje në një moment tjetër.
“Për të tjerat, këtu do të jemi dhe do të flasim”, ka përfunduar Gruda.
