Holandezi Van Gaal është shkarkuar nga Manchester United dhe tanimë është zyrtare. Lajmi që i parapriu finales së Kupës së Anglisë, të luajtur të shtunën në mbrëmje kundër Crystal Palace, se Mourinho do të ulej në pankinë, tani ka marrë formë të plotë, teksa holandezi Van Gaal duhej ta litonte më parë atë.
Holandezi ka boshatisur stolin e Manchester United së bashku stafin e tij, edhe ata holandezë, për t’i bërë vend tanimë ish-nxënësit të tij te Barcelona, Jose Mourinho. Fitorja në “FA Cup” nuk ishte alibi për të gjitha dështimet e sezonit, ndaj Van Gaal dhe stafi i tij u paraqitën të hënën në mëngjes së selinë qëndrore të United, ku zevendëspresidentin Ed Woodward u ka komunikuar shkarkimin të gjithëve.
Tani pritet vetëm zyrtarizimi i portugezit Mourinho, që me shumë gjasa do të ndodhë të martën në mbrëmje, pasi të kenë përfunduar të gjitha detajet teknike. “Special One” do të zërë vend në “Old Trafford” së bashku me dy besnikët e tij të përjetshëm, Rui Faria ndihmës i parë dhe Silvino Louro, trajner i portierëve.
Me shumë gjasa me të do të bashkohet edhe uellsiani Ryan Giggs, ndërkohë që orët e fundit është përfolur edhe për Zlatan Ibrahimoviç, që mund të luajë dy role në klub, atë të sulmuesit dhe të ndihmësit të trajnerit Mourinho.
