Një skandal dopingu rrezikon të trondisë futbollin britanik. Qeveria ka urdhëruar nisjen e menjëhershme të hetimeve nga ana e agjencisë anti-doping pas publikimit të lajmit për trajtimin e rreth 150 sportistëve nga ana e mjekut të dyshuar, Mark Bonar. Në listën e tij bëjnë pjesë edhe shumë futbollistë, por “The Sunday Times” thekson se për momentin nuk ka asnjë të dhënë që lojtarë të Premier League janë të lidhur drejtëpërdrejtë me mjekun në fjalë. Klubet nuk kanë reaguar për momentin pasi në media nuk kanë dalë emra konkretë, ndërsa Ministri i Sportit, John Whittingdale u shpreh i shokuar dhe i shqetësuar për këtë ngjarje ku mendohet se janë të përfshirë disa tenistë dhe atletë. “Kam kërkuar që të nisin menjëherë hetimet për të vërtetuar nëse ka lidhje të drejtëpërdrejtë mes mjekut dhe sportistëve pasi duhet të sigurohemi që sporti britanik të jetë i pastër. Për momentin nuk kemi asnjë të dhënë se sportistët kanë përdorur doping”, theksoi ai. Alarmin e parë për këtë çështje e dha pikërisht tabloidi britanik “The Sunday Times” që hodhi dyshimet për implikimin e shumë sportistëe por tashmë me aktivizimin e institucioneve zyrtare në Britanikë e Madhe, pritet të hidhet dritë sa më shpejt pasi në të kundërt, skandali mund të marrë përmasa edhe më të mëdha me pasoja tragjike për sportin britanik.
