Te Manchester United vjen momenti i Paul Pogba. Mesfushori francez që këtë verë u shndërrua në blerjen më të shtrenjtë në historinë e futbollit do të bëjë debutimin me Djajtë e Kuq këtë të Premte ndaj Southampton. Në Old Trafford e gjithë vëmendja do të jetë te mister 105 milionëshi me Pogba-në që do të mbajë sërish veshur fanellën e Manchester United. Në konferencën për shtyp përpara ndeshjes ndaj skuadrës së shenjtorëve, Jose Mourinho trajneri i 20-herë kampionëve të Anglisë konfirmoi faktin se Paul Pogba është gati për të luajtur. 23-vjecari i cili humbi ndeshjen e javës së parë ndaj Bournemouth për arsye pezullimi ka dicka më shumë se 10 ditë që stërvitet me Djajtë e Kuq dhe këtë të Premte do të jetë momenti i Pogba për të debutuar në sezonin 2016-2017 të Premier League me United.
Mourinho i pyetur nga gazetarët në lidhje me mesfushorin francez, theksoi se Paul edhe pse ka vetëm 10 apo 11 ditë që stërvitet me Manchester-in është përshtatur shumë shpejtë pasi ai njeh mirë ambientin për vetë faktin se te Djajtë e Kuq ka hedhur hapat e tij të parë në karrierë. Megjithatë Special One bëri të ditur se Pogba nuk është ende gati për të luajtur për 90 minuta dhe tifozët e United nuk duhet të presin një paraqitje super nga francezi që në ndeshjen ndaj Southampton.
