Frederic Veseli i shtohet listës së kuqezinjve, që duhet të gjejnë një skuadër për sezonin e ardhshëm. Mbrojtësi shqiptar nuk është më në planet e Lugano-s, me skuadrën modeste që sezonin e kaluar arriti të siguronte mbijetesën në Superligën zvicerane.
Edhe pse vetëm një muaj më parë, në faqen zyrtare të klubit në “facebook”, Lugano uroi Veselin për debutimin në Kampionatin Europian, situata tashmë ka ndryshuar.
Nga një titullar dhe një lojtar i nevojshëm për skuadrën, presidenti i klubit, Angelo Renzetti ka vendosur ta shesë mbrojtësin 23-vjeçar dhe synon të mbushë arkat e klubit.
Në deklaratën e dhënë për Radio-Televizionin Zviceran pas miqësores që Lugano fitoi me Servette-n, numri një i skuadrës tha se është “në pritje që Veseli të kthehet nga pushimet pas angazhimit në Euro 2016” dhe se në rast të një oferte në shifrën e pretenduar “për klubin lojtari shqiptar është në shitje”.
Vendimi i presidentit Renzetti ka ardhur pavarësisht faktit se mbrojtësi i Kombëtares ka edhe një vit të mbetur në kontratë me skuadrën liqenore, ku u transferua gjatë vitit 2015, ndërsa vlera e Frederic Veselit në merkato përllogaritet në afro 800 mijë euro./supersport.al/
