Kryeministri i vendit, Edi Rama, ju ka përgatitur një surprizë kuqezinjve në ditën e tyre të fundit në Itali. Mbrëmjen e së dielës kreu i ekzekutivit i shoqëruar dhe nga deputeti Bashkim Fino, i njohur për pasionin e tij për futbollit kanë vizituar hotelin ku ndodhet i grumbulluar ekipi Kombëtar në Bergamo ku kanë konsumuar dhe një kafe me Presidentin e FSHF, Armand Duka, trajnerin Gianni de Biasi, ndërsa më pas është bashkuar me ta Paolo Tramezzani. Vecanërisht i vëmendshëm në shpjegimet e tyre në një bisedë prej rreth 15 minutash ku me siguri është folur mbi të rejat e fundit nga kombëtarja dhe gjendjen e saj, Rama në dalje është takuar përzemërsisht dhe me kapitenin e Kombëtares Lorik Cana.
Kjo ishte thjesht një përshëndetje pasi kryeministri Rama ka parashikuar për mëngjesin e së Hënës edhe përcjelljen zyrtare të ekipit nga Italia në nisjen drejt Francës në vendgrumbullimin e Perros Guirec, një event ky që do të transmetohet live nga Supersport. Për sa i përket skuadrës pas një dite pushimi ku kanë patur mundësinë të takohen dhe me familjarët e tyre, stafi teknik i kombëtares dhe futbollistët janë grumbulluar te gjithe në mbrëmje në hotel, sic ishte parashikuar dhe në lejen e dhënë nga De Biasi dhe disa prej tyre janë mbledhur në holl duke preferuar të ndjekin nga afër shokun e skuadrës Ledian Memushaj në impenjimin e tij me Pescarën me Trappanin në ndeshjen e parë të finales së Play-Off-it që do të përcaktojë edhe se cila prej dy skuadrave do të ngjitet në Serinë A për sezonin e ardhshëm.
