Nga vetëm 4 euro për metër katror, Agjencia Kosovare e Privatizimit (AKP) ka shitur prona përmes negocimit direkt gjatë vitit 2025. Kjo praktikë, e kritikuar ashpër dikur nga tash kryeministri Albin Kurti dhe subjekti i tij politik, po vazhdon edhe gjatë qeverisjes së tij, ndonëse shuarja e AKP-së kishte qenë një nga premtimet më të mëdha të Kurtit sa ishte në opozitë.

Por, 7 vite më pas, AKP-ja jo vetëm që nuk është shuar, por vazhdon të shesë prona përmes negocimit direkt, madje në disa raste me çmime prej vetëm 4 eurosh për metër katror. Pikërisht shitja direkte e pronave dhe çmimet e ulëta ishin ndër praktikat për të cilat Kurti kishte drejtuar kritika të vazhdueshme ndaj kësaj agjencie dhe pushteteve të mëparshme.

Derisa hulumtim i Gazetës Infokus, i bazuar në dokumentet zyrtare të AKP-së, zbulon se vetëm gjatë vitit 2025 janë evidentuar 54 shitje me negocim direkt, që së bashku përfshijnë mbi 62 mijë metra katrorë prona të shtetit.

Për të siguruar këtë dokumentacion, Gazeta Infokus është detyruar t’i drejtohet edhe Agjencisë për Informim dhe Privatësi, pas vështirësive në sigurimin e qasjes në dokumentet e AKP-së.

Pas ankesës, Infokus ka arritur të sigurojë 54 dokumentet që lidhen me shitjet direkte të realizuara gjatë vitit 2025.

Analiza e këtyre dokumenteve nxjerr në pah dallime të mëdha në çmimet e shitjes, nga vetëm 4 euro për metër katror deri në qindra euro, varësisht nga kategoria dhe lokacioni i pronave.

Në mesin e tyre janë evidentuar raste ku mbi një mijë metra katrorë tokë janë shitur për më pak se 4,500 euro, por edhe prona me sipërfaqe mbi 11 mijë metra katrorë, të shitura për vetëm 6.40 euro metri katror.

Mbi 1 mijë metra katrorë pronë për vetëm 4 euro metri katror

Një nga rastet që bie në sy në dokumentacionin e siguruar nga Gazeta Infokus është shitja direkte e një prone në zonën kadastrale Turiçec.

Sipas dokumenteve të AKP-së, blerës i kësaj prone është Agim Berisha, i cili për një sipërfaqe prej mbi një mijë metrash katrorë ka paguar gjithsej 4 mijë e 492 euro.

Çmimi i shitjes rezulton të jetë vetëm 4 euro për metër katror.

Pra, për më shumë se një mijë metra katrorë tokë, vlera e përgjithshme e shitjes nuk ka arritur as në 4,500 euro.

Por ky nuk është rasti i vetëm në të cilin AKP-ja ka shitur prona me këtë çmim.

Vetëm 238 euro për 59.5 metra katrorë pronë e shtetit

Një tjetër rast i shitjes direkte për vetëm 4 euro metri katror është evidentuar në zonën kadastrale Rakosh.

Sipas dokumentacionit të analizuar nga Infokus, AKP-ja ia ka shitur Skender Jahajt 59.5 metra katrorë pronë të ndërmarrjes shoqërore “Korenik”.

Vlera e përgjithshme e shitjes ka qenë vetëm 238 euro.

Edhe në këtë rast, çmimi për metër katror rezulton të jetë 4 euro, duke e renditur këtë transaksion ndër shitjet me çmimin më të ulët të evidentuara në dokumentacionin e siguruar.

Mbi 11 mijë metra katrorë në Fushë Kosovë – vetëm 6.40 euro metri katror

Një nga rastet më të mëdha për nga sipërfaqja është evidentuar në Fushë Kosovë.

AKP-ja, përmes negocimit direkt, i ka shitur Shaip Kutllovcit 11 mijë e 825 metra katrorë pronë, për një vlerë të përgjithshme prej 75 mijë e 680 eurosh.

Nga përllogaritja e sipërfaqes dhe vlerës së shitjes, rezulton se prona është shitur për vetëm 6.40 euro për metër katror.

Kështu, një sipërfaqe prej mbi 11 mijë metrash katrorë është shitur për më pak se 76 mijë euro.

Kjo është një nga shitjet me sipërfaqen më të madhe të identifikuara nga Gazeta Infokus në dokumentet e AKP-së për vitin 2025.

Edhe dy prona në Magurë u shitën për rreth 6.40 euro metri katror

Çmime të ngjashme janë evidentuar edhe në dy shitje të tjera direkte, të realizuara në Magurë të Obiliqit.

Sipas dokumenteve të AKP-së, Daut Nishori figuron si blerës i 885 metrave katrorë pronë, për të cilët ka paguar gjithsej 5 mijë e 664 euro.

Kjo shumë përkthehet në 6.40 euro për metër katror.

Ndërkohë, Fatmir Nishori ka blerë 861 metra katrorë pronë, për një vlerë të përgjithshme prej 5 mijë e 510 eurosh, që po ashtu rezulton në rreth 6.40 euro për metër katror.

Të dyja këto shitje lidhen me pronat e ndërmarrjes “Miniera e Magnezit Golesh”.

Vetëm në këto dy raste, AKP-ja ka shitur gjithsej 1 mijë e 746 metra katrorë pronë për 11 mijë e 174 euro.

54 shitje direkte, mbi 62 mijë metra katrorë prona për 2.15 milionë euro

Por historia nuk përfundon te rastet individuale.

Analiza e të gjithë dokumentacionit të siguruar nga Gazeta Infokus tregon se gjatë vitit 2025 janë evidentuar gjithsej 54 shitje të pronave përmes negocimit direkt nga AKP-ja.

Sipërfaqja e korrigjuar e tokës dhe aseteve të përfshira në këto shitje arrin në 62 mijë e 934 metra katrorë, ndërsa vlera e përgjithshme, sipas vendimeve finale, është rreth 2 milionë e 150 mijë euro.

Në mesin e pronave të shitura përfshihen kategori të ndryshme.

Sipas analizës së Infokus, janë evidentuar 24 raste të shitjes së tokave, parcelave apo pjesëve ideale, 19 prona rezidenciale, pesë prona komerciale, tri prona industriale dhe një lokal afarist.

Në disa raste, krahas tokës, shitjet përfshijnë edhe objekte apo lokale.

Çmimet e këtyre pronave dallojnë ndjeshëm nga njëra-tjetra, duke filluar nga vetëm 4 euro për metër katror e deri në qindra euro.

Megjithëse bëhet fjalë për prona të kategorive dhe lokacioneve të ndryshme, rastet e shitjeve me çmime prej 4 dhe 6.40 eurosh për metër katror janë ndër gjetjet kryesore të këtij hulumtimi.

Këto shitje rikthejnë në vëmendje pikërisht praktikën e negocimit direkt, e cila kishte qenë objekt i kritikave të vazhdueshme politike në të kaluarën.

17 shitje vetëm nga një objekt në Prishtinë – tetë blerës me mbiemër të njëjtë

Përveç çmimeve të ulëta, analiza e dokumenteve të AKP-së ka nxjerrë në pah edhe një grup tjetër shitjesh që tërheq vëmendjen.

Bëhet fjalë për 17 shitje direkte të lidhura me të njëjtin parcelim fillestar në Prishtinë.

Nga dokumentacioni i analizuar nga Gazeta Infokus rezulton se tetë prej blerësve të këtyre pronave mbajnë të njëjtin mbiemër.

Këto shitje janë evidentuar si pjesë e një grupi të veçantë transaksionesh, për të cilat Infokus do të vazhdojë hulumtimin, duke shqyrtuar mënyrën e parcelimit, procedurat e shitjes, çmimet dhe dokumentacionin përkatës.

Gazeta Infokus do të vazhdojë publikimin e gjetjeve nga dokumentacioni i siguruar për shitjet direkte të AKP-së, përfshirë edhe rastet e identifikuara në Prishtinë.

/Gazeta Infokus