Pas thuajse një jave në krye të Bayern Munchen, Carlo Anceotti ka përzgjedhur edhe fjalën që i pëlqen më tepër në gjuhën gjermane. “Sieg”. Fitore. E mësoi, e memorizoi dhe nuk nguron ta përdorë. Ashtu si provon gjithmonë ti përgjigjet pyetjeve të gazetarëve në gjuhën e tyre.
“Edhe stërvitjen e drejtoj në gjermanisht. Të gjithë duhet ta mësojnë gjuhën e vendit ku punojnë, është çështje profesionalizmi. Megjithatë, ndonjëherë me Ribery komunikoj në italisht, ndërsa me Alonso e Bernat në spanjisht. Por, kur zemërohem, preferoj ta shfryhem në gjuhën time. Nëse do të më dëgjojnë duke folur italisht, lojtarët do ta kuptojnë që kemi një problem.”
Më 11 Korrik, ish-trajneri i Milanit, Juventusit, Realit dhe Chelsea, nisi zyrtarisht aventurën me kampionët e Gjermanisë. Kjo periudhë i dha kohën e mjaftueshme për të bërë bilancin paraprak të ekipit, por edhe rreth rivalëve të Borussia Dortmund.
“Jam mjaft i kënaqur. Skuadra është e përqendruar, ndërsa jemi të mbuluar në të gjitha rolet. Përsa i takon Dortmundit, pavarësisht largimeve të Hummels, Gundogan e Mkhitaryan janë po aq të fortë sa sezonin e kaluar. Kanë një skuadër konkurruese me lojtarë të talentuar.”
Ancelotti konfirmoi se Thomas Muller do të mbetet një prej elementëve më të rëndësishëm të Bayernit, pavarësisht Europianit zhgënjyes, ku nuk arriti të shënonte asnjë gol. Sipas trajnerit, sulmuesi duhet të pushojë, për të qenë vendimtar për bavarezët.
