Arsenal mbetet në garë për të marrë shërbimet e Shkodran Mustafi nga Valencia dhe “topçinjtë” po vazhdojnë negociatat me klubin spanjoll. 24-vjeçari është kërkuar me ngulm nga trajneri Arsene Wenger duke parë se qendërmbrojtësit Per Mertesacker dhe Gabriel janë të dëmtuar. Lojtari i Gjermanisë, me origjinë shqiptare, shihet si përforcimi i duhur për të ndalur problemet në prapavijë, teksa Arsenal e nisi kampionatin duke pësuar katër gola, të dielën ndaj Liverpool.
Menaxheri i Shkodran Mustafit, Ali Bulut dhe babai i futbollistit Kujtim Mustafi, janë bindur nga oferta e Arsenal, por tani i takon londinezëve të plotësojnë kërkesat financiare të Valencia. “Djali im është futbollist i Valencia dhe kjo është e vetmja gjë e rëndësishme për momentin. Nuk mund të them më shumë dhe nuk mund të konfirmoj asgjë, sepse ai ka një kontratë me Valencia dhe janë ata që do të vendosin për të ardhmen e tij. Di që po bisedojnë me Arsenal, sepse ma konfirmuan vetë.” – tha Kujtim Mustafi.
Pavarësisht dëshirës së Arsenal dhe futbollistit, marrëveshja që pritej të arrihej në mesjavë ka ngecur pasi Valencia kërkon 40 milionë euro, ndërsa “topçinjtë” ofruan 35 milionë. Mustafi është zgjedhja e parë e Wenger, nëse blerja e tij do të dështojë alternativat janë Omer Toprak i Leverkusen dhe Simon Kjaer i Fenerbahce. Secili prej tyre nuk kushton më shumë se 25 milionë euro. Aaron Ramsey do të mungojë për një muaj si pasojë dëmtimi, kësisoj, kundër Leicester City, në vend të uellsianit do të luajë njëri mes Granit Xhaka, Santi Cazorla dhe Jack Wilshere.
