Vetëvendosje, përmes një kumtese për medie njofton se Policia e Kosovës ka arrestuar katër aktivistë të saj. Sipas kumtesës, transmeton Koha.net, aktivistët Zgjim Hyseni, Egzon Azemi, Arbër Morina dhe Lekë Isufi janë arrestuar gjatë periudhës që po merreshin me aktivitetet e planifikuara për datën 8 Mars, Ditën Ndërkombëtare të Gruas.
Arsyet pse policia i ka arrestuar aktivistët, nuk janë bërë të ditura. Atyre nuk i është treguar asnjë fletarrest, dhe, siç thotë kumtesa, sipas traditës së shtetit policor, thjesht ata janë kidnapuar në një aksion të papritur ku janë angazhuar policë të uniformuar dhe policë civilë.
Organizimi i këtij arrestimi në mes të një rruge kryesore të Prishtinës, në një orar tepër të frekuentuar prej këmbësorëve, tregon se sulmet policore të urdhëruara nga pushteti kriminal, kanë si synim edhe terrorizimin e qytetarëve, thotë kumtesa.
Vetëvendosje kërkon lirimin e menjëhershëm të aktivistëve, dhe dënimin e urdhërdhënësve e zbatuesve të këtyre veprimeve të përndjekjes politike.
