Spanja i bën mbylljen më të keqe të mundshme serisë së miqësoreve me një humbje të papritur kundër Gjeorgjisë në ndeshjen e zhvilluar në Getafe. Kombëtarja La Roja u dorëzua pas 90 minutave të dobëta ku vendosi goli i shënuar nga Okriashvilli në minutën e 40 të takimit. Del Bosque e nisi ndeshjen me treshen e sulmit, Thiago-Fabregas-Aduriz por eksperimenti në fazën e sulmit rezultoi i dështuar për kampionët në fuqi të Europës, të cilët po tregojnë luhatje të mëdha në lojë. Ndeshja nisi me ritëm të lartë nga vendasit që nuk arritën të gjenin rrugën e golit në disa raste, gjithsesi të rinjtë Bellerin e Lucas Vasquez nuk arritën të bindin trajnerin Del Bosque. Gjatë fraksionit të dytë, Del Bosque vendosi të hidhte në fushë armatën e rëndë të drejtuar nga Iniesta dhe Koke në mesfushë, por as Nolito nuk arriti të gjente rrugën e rrjetës, duke u dorëzuar në një 90 minutësh ku treguan se nuk janë ende gati për ndeshjen e parë ndaj Çekisë në 13 Qershor./supersport.al/
