Milaim Zeka, gazetar dhe analist politik, ka thënë se listën me emrat e personave që do të akuzohen nga Gjykata Speciale e ka parë personalisht dhe nuk ka shpifur asgjë.
Ai në emisionin Info Magazine të Klan Kosovës ka rikonfirmuar emrat që i ka publikuar dje nëpër mediat sociale, përkatësisht ise sh zyrtarët e lartë të UÇK-së që do të akuzohen nga Gjykata Speciale, transmeton Telegrafi.
“Nuk kam dashur ta dëmtojë procesin i cili është jashtëzakonisht i rëndësishëm për të ardhmen e Kosovës. Lajmi se kush do të akuzohet në Hagë është i dhimbshëm. Unë e kam pa listën dhe aty ndodhet: Hashim Thaçi, Azem Syla, Kadri Veseli, Xhavit Haliti, Agim Çeku, Bislim Zyrapi, Rexhep Selimi, Daut Haradinaj, Lahi Brahimaj, Blerim Kuçi dhe Fatmir Limaj. Është edhe Ajvaz Berisha, profesor i Universitetit të Prishtinës dhe Iljaz Dërguti”, ka thënë Milaim Zeka.
Zeka deklaroi se burimet janë të besueshme dhe se beson në pafajësinë e të akuzuarve dhe se Specialja është dashur të votohej.
“Unë nuk kam dashtë me e dëmtu procesin që është i vlefshëm për ecjen e Kosovës përpara. Faturën për lirinë dhe pavarësinë e Kosovës e kanë paguar: SHBA-të, BE-ja dhe UÇK-ja. Besoj dhe dua të besoj që Hashim Thaçi ka kaluar sfida më të mëdha në jetë, sfida më e madhe e tij ka qenë Rambujeja. Ndaj besoj se do ta kalojë edhe këtë sfidë. Unë dua të besoj në fjalët e kryekuvendarit Kadri Veseli që tha: ‘Jetën paslufte e kam dhuratë nga Zoti”, deklaroi Zeka, njofton Klan Kosova.
“Gjithmonë në Kosovë ka teori konspiracioni, për shembull një lider i një partie politike në një nga hotelet e Kosovës më ka thënë që ‘punoj për Kadri Veselin’. Burimi i informacionit është ndërkombëtar dhe për mua është shumë i besueshëm.”
Gazetari Zeka tha se këta njerëz ka kohë që janë akuzuar edhe prej shqiptarëve, duke përfshirë edhe veten.
“Këta njerëz, nga i pari deri tek i fundit ka kohë që kanë qenë të akuzuar prej shqiptarëve. Njeriu i parë në opinionin shqiptar që është akuzuar për vrasje të pasluftës kam qenë unë, prandaj unë them që gjykatat është dashur të merren me mua.”
“Nuk ka qenë e lehtë që t’i publikoj emrat kur shumicën e tyre i kam miq, e disa edhe familjarë. Lista është e saktë; kush dënohet vendosë gjykata e jo prokuroria. Ilaz Dërguti akuzohet për një vrasje për të cilën unë jam i bindur 99 përqind, që ai nuk ka lidhje”, tha ai.
