>Disa të rinj kanë nisur në sheshin “Nëna Terezë” shpërndarjen e një letre, në të cilën është vënë logoja e Policisë së Kosovës, e me të cilën kinse kërkohet arrestimi i Isa Mustafës dhe dy djemve të tij.
Kjo ironi e këtyre të rinjve, tash për tash të paidentifikuar, vjen pas raportimit në media se Qeveria e Kosovës i ka dhënë tenderin për servisimin e një BMW-je qeveritare në shumën prej rreth 3 mijë eurosh.
Në letër thuhet se “të pandehurit akuzohen për nepotizëm dhe shfrytëzim të buxhetit shtetëror për përfitime personale”.
Gjithnjë sipas kësaj letre “arrestimi i Besnik Isa Mustafës, Arben Isa Mustafës dhe Isa Mustafës do të jetë në shërbim të së mirës së përgjithshme, prandaj i ftojmë të gjithë qytetarët që të bashkëpunojnë me ne”, thuhet në letër, që mban titullin “Udhërarrest”.
Letra mban edhe një nënshkrim, kinse të “Komandantit të përgjithshëm të Policisë së Kosovës”.
