Donald Trump ka kërcënuar se do të vendosë tarifa prej 25% ndaj Bashkimit Evropian, duke pretenduar se blloku prej 27 vendesh është “formuar për të dëmtuar Shtetet e Bashkuara”, raporton The Guardian.
“Ky është qëllimi i saj dhe ata kanë bërë një punë të mirë. Por tani unë jam president”, citohet të ketë thënë Trump, transmeton gazeta online Reporteri.net.
Duke folur në takimin e tij të parë të kabinetit të mërkurën, presidenti i SHBA tha se së shpejti do të publikojë detajet e kërcënimit të fundit tarifor. “Kemi marrë një vendim dhe do ta shpallim shumë shpejt. Do të jetë 25%,” tha ai.
BE-ja u zotua të përgjigjet “në mënyrë të vendosur dhe menjëherë” ndaj barrierave “të pajustifikuara” tregtare, duke sinjalizuar se është e gatshme të hakmerret me shpejtësi kundër tarifave të reja.
Blloku është partneri i tretë më i madh tregtar i SHBA-së së bashku me Kinën. Trump ka thënë se do të vendosë tarifa 25% ndaj dy partnerëve më të mëdhenj tregtarë të SHBA-së, Kanadasë dhe Meksikës, javën e ardhshme.
Trump nuk dha detaje të mëtejshme, por përmendi prodhuesit e makinave dhe tha se taksat do të aplikoheshin “në përgjithësi”. “Dhe kjo do të jetë në makina dhe të gjitha gjërat e tjera,” tha ai.
Një zëdhënës i Komisionit Evropian tha: “BE do të reagojë me vendosmëri dhe menjëherë kundër barrierave të pajustifikuara ndaj tregtisë së lirë dhe të ndershme, duke përfshirë kur tarifat përdoren për të sfiduar politikat ligjore dhe jodiskriminuese. BE-ja do të mbrojë gjithmonë bizneset, punëtorët dhe konsumatorët evropianë nga tarifat e pajustifikuara.”
Trump ka bërë një sërë njoftimesh për vendosjen e tarifave ndaj partnerëve më të mëdhenj tregtarë të SHBA-së, por ka vonuar vazhdimisht vendosjen e taksave ndaj Kanadasë dhe Meksikës.
