Zëvëndëskryeministri dhe ministri i Jashtëm, Hashim Thaçi, në emisionin “Ora e Fundit” të Klan Kosovës, duke folur për ngjarjen e ditës së sotme në seancën e Kuvendit të Kosovës, ka dënuar rëndë veprimin e opozitës.
“Reagimi i deputetëve të opozitës, ka qenë i papranushëm, jo i duhur dhe i shëmtuar për Kosovën. Vetë ata që kërkojnë gjëra të tilla, raportime, e bllokojnë punën e Kuvendit”, tha zëvendëskryeministri Thaçi.
“Pengesa për të prezantuar, apo raportuar për marrëveshjet, kanë qenë pengesa të pajustifikushme dhe të dëmshme për opinionin publik kosovar. Por edhe një pamje e keqe e Kosovës përballë ndërkombëtarëve”, u shpreh Thaçi.
Seanca e ditës së sotme u ndërpre nga një aksion i opozitës ku ata gjuajtën vezë në drejtim të kryeministrit Isa Mustafa.
Në seancën e ditës së marte Mustafa do të raportonte për marrëveshjet e 25 gushtit në Bruksel.
Mirëpo, pavarësisht që ai tentoi tri herë që në foltoren e Kuvendit të raportojë për këto marrëveshje, kjo gjë nuk u mundësua nga opozita.
Thaçi ka folur edhe për marrëveshjen e demarkacionit me malin e Zi, dyuke thënë se Kosovës nuk i është marrë asnjë pjesë e territorit të saj.
“Sa i përket demarkacionit me Malin e Zi, askush nuk mund të kontestojë kufinjtë e Kosovës. Nuk i është dhënë askujt asnjë metër katror e Republikës së Kosovs”.
Zëvëndëskryeministri u bënë thirrje opozitës që të kuptojnë me të vërtetë realitetin e Kosovës.
“Opozita nuk kanë argument që të ballafaqohen me mazhorancën. Unë ritheksoj se në vend të atakimeve të motivuara politikisht, ata duhet të ulen dhe të analizojnë marrëveshjet e jot ë flasin, duke mos ditur realitetin në Kosovë”.
Ai gjithashtu tha që nuk do të ketë zgjedhje të parakohshme.
“Nuk ka arsye të ketë zgjedhej të parakohshme para vitit 2018. Çështja e Presidentit është çështje tjetër, ne duhet të plotësojmë marrëveshjet e arritura me partnerin e koalicionit”.
Kurse për kërkesën e opozitës për tërheqjen e nënshkrimit ai e shikon si qesharake.
“Tërheqja e nënshkrimit është çështja më qesharake, e më jo politike që mund të ndodh. Ai është shprehur se opozita është e pashpresë. Opozita është e pashpresë, e shohin vetëm zi, terr dhe jo progres”.
