Letra që një djalosh 6-vjeçar me shtetësi amerikane i dërgoi presidentit Barcka Obama preku zemrat e mjaft qytetarëve në mbarë botë.
Aleksi i kërkonte shefit të Shtëpisë së Bardhe që t’i mundësojë udhëtimin për në shtëpinë e tij në New York Omran Daqneesh – djaloshi që tronditi botën me pamjen e tij pas një bombardimi të forcave siriane në Aleppo. Me fjalët e sinqerta të një 6-vjeçari, Aleksi thotë se është i gatshëm që ta strehojë Omranin në shtëpinë e tij, së bashku me familjen. Por ambasada amerikane në vendin tonë, ka zbuluar një detaj mjaft interesant i cili nuk dihej deri më tani. Aleksi 6-vjeçar është djali I dy prindërve shqiptarë.
Obama e bëri publike letrën në samitin e Kombeve të Bashkuara, ku iu drejtua anëtarëve të samitit “të gjithë duhet të jemi si Alex”.
Ja çfarë shkruan presidenti Obama për të.
“Alex është vetëm 6 vjeç. Muajin e kaluar, ashtu si shumë njerëz në botë, ai u prek nga pamjet zemërthyese të Omran Daqneesh, një djalë 5 vjeçar në Aleppo, Siri, ulur në një ambulancë, i tronditur teksa fshinte gjakun nga duart e tij. Alex u ul dhe më shkroi një letër. Këtë javë, në samitin e Kombeve të Bashkuara për refugjatët unë ndava me të gjithë botën fjalët prekëse të Alexit. Ai më tha se donte që Omrani të vinte dhe të jetonte me familjen e tij. Ai donte ti jepte biçikletën e vet dhe ta mësonte si ta ngiste atë. Ai tha se motra e tij do mblidhte flutura për të. “Ne mund të luajmë të gjithë bashkë,” shkruante ai. “Ne do të bëhemi familja e tij dhe ai do të jetë vëllai ynë.” Këto janë fjalët e një djali 6 vjeçar – një djalë i vogël që nuk ka mësuar të jetë cinik, apo dyshues apo të ketë frikë nga njerëzit e tjerë për shkak të vendit nga ata vijnë, për shkak të pamjes së tyre apo të mënyrës se si luten. Ne të gjithë duhet të jemi si Alexi. Përfytyroni si do të dukej bota po të ishim të tillë. Përfytyroni sa vuajtje do të kursenim dhe sa jetë do të shpëtonim. Dëgjoni Alexin teksa lexon letrën e tij dhe reflektoni se përse unë e ndava atë me të gjithë botën.”
Presidenti Barack Obama
/Gazeta Express/
