Pas heqjes së barrikadës mbi urën e lumin “Ibër”, do të fillojë heqja barrikadave dhe shesheve tjera që kishin ngritur serbet në veri të Mitrovicës, ka deklaruar Edita Tahiri, për Indeksonline.
Ajo ka thënë se me marrëveshjen e 25 gushtit të vitit të kaluar është paraparë që gjitha llojet e pengesave në urë dhe rreth urës duhet të hiqen dhe tu kthehet qytetarëve ajo pjesë.
“Të gjitha barrikadat dhe sheshet që janë ngritur në veri të Mitrovicës nga serbet do të hiqen. Ne jemi duket punuar për zbatimin e planit rregullativ, qendror edhe lokal, si çdo komunë tjetër edhe ajo veriut duhet t’i bindet autoritetit qendror”, ka thënë ajo.
Kryenegociatorja Tahiri ka siguruar se vënia e barrikadave nuk do të përsëritet më kurrë në veri të vendit.
Ajo ka shprehur besimin se e ka mbështetjen edhe të liderëve serbë të veriut.
“Vënia e barrikadave të reja nuk do të përsëritet më në Mitrovicën e veriut, sepse është një investim i madh i shtetit dhe popullit te Kosovës, por është edhe investim i partnerëve tanë, atyre amerikan dhe evropian. Marrëveshja e Brukselit është marrëveshje tre palëshe, Serbia për një vit e kishte bllokuar këtë marrëveshje por me këmbëngulësinë e Bashkimit Evropian dhe qeverisë Amerikane, u detyruan ta zbatojnë marrëveshjen”, ka thënë Tahiri.
