Komuna e Prishtinës së bashku me fondacionin Jeshil sot kanë lansuar pilot projektin “Kopshti 314 – Pikë Demonstrimi për Permakulturë”.
Ky projekt përkrah fuqizimin e adoleshentëve nga SOS fshatrat e fëmijëve duke rritur aftësitë vetë-mbështetëse gjatë moshës madhore përmes aftësimit praktik dhe aktiviteteve arsimore-edukative.
Ata synojmë të zhvillojnë kapacitete brenda SOS fshatit të fëmijëve në Prishtinë sa i përket prodhimit të ushqimit organik, për të mbuluar pjesërisht nevojat e tyre ushqimore. Gjithashtu ata mbështesin rritjen psiko-sociale dhe arsimore të adoleshentëve në SOS fshatin e fëmijëve dhe promovojnë shkëmbimin dhe mësimin me bashkë-moshatarët përmes permakulturës dhe të mësuarit aktiv.
Kryetari i Prishtinës, Shpend Ahmeti tha se SOS fshati është njëri prej institucioneve më të mira të qytetit tonë. Ai gjithashtu tha se po të vazhdoni me mbjelljen e produkteve që ato të përdoren për kopshtin dhe ushqimin e fëmijëve .
“SOS fshati është njëri prej institucioneve më të mira të qytetit tonë, një pjesë të kësaj e kemi pru edhe çerdhen ne komunitet që e mbështet komuna, dhe ne po e lidhim tash me një projekt të vetë qëndrueshmërisë. Kemi harru se si të jemi të vetë qëndrueshëm, si ta punojmë tokën, si të mbjellin gjera, si të përdorim ujin në mënyrë të qëndrueshme dhe synojmë që ta bëjmë një pilot projekt. Ne i mbështesim si komunë, ku fondacioni Jeshil me SOS një pjesë të kopshtit do ta përdorin për mbjelljen e kulturave permanente apo perma-kulturat dhe sot në një mënyrë simbolike filluam me një mollë. Ky është një projekt më i gjerë ku do të ketë edhe sistem të ujitjes, do të mbjellim edhe produkte të ndryshme dhe ato do të përdoren për kopshtin për ushqimin për fëmijët”, tha kryetari Ahmeti.
Drejtori ekzekutiv i fondacionit Jeshil, Xhevdet Gegolli tha se qëllimi kryesor i këtij projekt është t’i fuqizoj të rinjtë e SOS fshatit, t’i ndihmoj ata të krijojnë kapacitete prodhuese dhe të përparoj zhvillimin psiko-social të fëmijëve.
“Sot jemi mbledh këtu në ceremoni inauguruese për promovimin e pilot projektit të cilin e kemi filluar si fondacion Jeshil së bashku me Sos fshatin në Prishtinë. Ky projekt i ka tri qëllime të cilat tenton t’i realizoj , e para është t’i fuqizoj të rinjtë e Sos fshatrave, për një të ardhme duke iu ofruar shkathtësi arsimore-edukative. E dyta është t’i ndihmoj SOS fshatit të krijoj kapacitete prodhuese për ushqim organik, këtu brenda institucionit, të cilët pastaj mund t’i shfrytëzojnë për nevoja të veta institucionale, dhe e treta është që ky projekt të përparoj zhvillimin psiko-social të fëmijëve në SOS fshat. Kemi pasur kënaqësi të kemi edhe kryetarin këtu me neve, të përuroj projektin, është një projekt afatgjatë dhe shpresoj që të ketë sukses”, tha Gegollli
Gegolli tha se ky projekt po punohet në disa faza, ku në fazën e parë kanë planifikuar të mbjellin pemë, ti rregullojnë shtretërit për kopsht dhe të punojmë me një energji të ripërtritshme dhe të shohin nëse munden resurset e saj t’i fusin në shfrytëzim për nevojat e këtij kopshti. Mes të tjerash ai tha se fëmijët përveç se do të konsumojnë ushqim më të shëndosh, ushqim organik, ata do të kenë mundësin të mësojnë edhe për lëndë me interes si; biologji, botanik, agro-kulturë dhe shumë fusha të tjera edukativo-arsimore.
