Aty konsiderohet se me gjithë përparimet që ka shënuar Kosova në implementimin e kritereve, ajo nuk mund të marrë një rekomandim pozitiv sa i takon liberalizimit të vizave.
Raporti në kapitullin 3 faqesh për Kosovën nis me vlerësimin pozitiv për nënshkrimin e MSA-së por nuk është ashtu edhe vazhdimi i tij.
Një mori kritikash e rekomandimesh në veçanti për politikën, reformat në gjyqësorë, korrupsion janë dhënë në raport. Këshilli thekson rëndësinë e përmbushjes së të gjitha kushteve të përcaktuara për liberalizim të vizave dhe inkurajon Kosovën për të vazhduar me përpjekjet për të bërë progres në procesin e liberalizimin e vizave.
Ngërçi politik që momentalisht është në Kosovë, duhet të zgjidhet urgjentisht, rekomandon Këshilli.
Në raport thuhet se Këshilli Evropian e dënon përdorimin e dhunës, posaçërisht për qëllime politike dhe pengimin e punës së Kuvendit nga partitë opozitare, duke i bërë thirrje atyre që ta ndalin këtë menjëherë.
Këshilli vlerëson se Kosova duhet të qëndrojë aktive dhe konstruktive e angazhuar në normalizimin e marrëdhënieve me Serbinë.
Liberalizimi i vizave dhe vonesat në këtë proces, kanë nxitur në reagime të ashpra ministrin e Punëve të Jashtme, Hashim Thaçi. Pas publikimit të konkluzave të Këshillit të Bashkimit Evropian për procesin e Zgjerimit dhe Stabilizim Asociimit, Thaçi është ngutur madje Bashkimin Evropian ta cilësojë si të paaftë.
Vonesat absurde, siç ka shkruar Thaçi, nxisin ekstremizmin në vend dhe rrisin frustrimin te qytetarët, por edhe po vënë në rrezik dialogun. Por, ministri për Integrime, Bekim Çollaku, nuk është ngutur dhe i kontaktuar nga medie, ka preferuar të presë raportin para se të komentojë, transmeton Koha.net .
Reagime këto konkluza të Këshillit kanë nxitur edhe te subjektet opozitare, që kanë drejtuar akuza ndaj ekzekutivit. Lëvizja Vetëvendosje në një reagim ka shkruar ‘se përderisa lufta kundër kapjes së shtetit i lihet në dorë aktorëve kryesorë që e kanë kapur atë, liberalizimi nuk do të ndodhë’. Megjithatë, raporti me konkluzionet e Këshillit nuk është ai nga i cili pritet rekomandimi për ose kundër liberalizimit të vizave.
