Fillimi i vitit shkollor 2016/17 është shtyrë për dy ditë pune nga data 1 shtator (e enjte) deri më datë 5 shtator (e hënë), njofton Ministria e Arsimit, Shkencës dhe Teknologjisë. Sipas njoftimit dërguar për media arsyeja e shtyrjes është se ende nuk është bërë sigurimi në tërsi i teksteve shkollore dhe materialeve të tjera.
“Ministria e Arsimit, Shkencës dhe Teknologjisë (MASHT), është në fazën e fundit të realizimit të procedurave ligjore për blerjen dhe sigurimin e teksteve shkollore dhe materialeve tjera mësimore, mirëpo për shkaqe të pamjaftueshmërisë së buxhetit për blerjen e tyre, derisa së fundi është gjetur zgjidhje me Ministrinë e Financave, në bazë të legjislacionit në fuqi, nuk ka mundur të fillojë procedurat e blerjes dhe sigurimit të tyre”, thuhet në njoftim.
“Ministria e Arsimit, Shkencës dhe Teknologjisë (MASHT), siguron komunitetin shkollor se po punohet intensivisht për finalizimin sa më të shpejtë të këtij procesi, dhe se në javën e parë të fillimit të procesit edukativo-arsimor do të pajisen të gjithë nxënësit e shkollave fillore dhe të mesme të ulëta me tekste shkollore dhe materiale tjera mësimore.
Përndryshe, në bashkëpunim me Drejtoritë Komunale për Arsim, janë koordinuar të gjitha aktivitetet për fillimin e mbarë të vitit të ri shkollor.
Ministria e Arsimit, Shkencës dhe Teknologjisë (MASHT), falënderon për bashkëpunimin dhe mirëkuptimin të gjitha Drejtoritë Komunale për Arsim, personelin arsimor, nxënësit, prindërit dhe komunitetin shkollor” përfundon kumtesa për media.
