Forca të shtuara të policisë së Kosovës po ruajnë shtëpinë e kryeministrit Isa Mustafa, në rrugën “Ilir Konushevci” në Prishtinë.
Njëri nga fqinjët e tij ka thënë për Koha.net se që nga aksioni i Vetëvendosjes ka më shumë policë në lagje.
Policët zakonisht ruajnë shtëpinë e kryeministrit nga një kabinë brenda oborrit, por të mërkurën janë parë edhe para shtëpisë.
Më herët aktivistët e Vetëvendosjes kanë lëshuar një “urdhërarrest” për kryeministrin Isa Mustafa dhe dy djemtë e tij, me arsyetimin se po i bëjnë dëm buxhetit të shtetit. Ata kanë kopjuar logon e Policisë së Kosovës në këtë letër, të cilën e kanë shpërndarë në shesh.
Dje aktivistë të Vetëvendosjes ishin nisur te shtëpia private e kryeministrit Mustafa në fshatin e tij të lindjes në Prapashticë, ku po synonin të vendosnin një pankartë me mbishkrimin “Shite pronën tënde, e jo Kosovën”.
Ky aksion i Vetëvendosjes vjen pas lajmit të raportuar se kryeministria kishte dhënë një tender prej rreth 3 mijë eurosh për servisimin e një BMW-je për kompaninë që menaxhohet nga djali i kryeministrit. Ndërkaq është edhe nënshkrimi i Isa Mustafës i vënë mbi marrëveshjen për themelimin e Asociacionit të Komunave me shumicë serbe e cila nuk po u pëlqen aktivistëve të LVV-së.
Më parë ata kishin shkruar në murin e objektit qeveritar te ish-Rilindja sloganin “Djemve Tenderat, Serbisë Zajednicën”, transmeton koha.
Kundër këtyre veprimeve të Vetëvendosjes ka reaguar ashpër kryeministri Isa Mustafa, si dhe Qeveria e LDK-ja, të cilat ai i udhëheq.
