Dy persona kanë mbetur të plagosur si pasojë e një konflikti të përgjakur të ndodhur mbrëmjen e djeshme në Sukth të Durrësit.
Si të dyshuar për ngjarjen u bë arrestimi në flagrancë i vëllezërve Edison Bakenaçi 40 vjeç dhe Alfred Bakenaçi 36 vjeç, banues në Shijak.
Burime zyrtare nga policia thanë për NOA.al, se dy vëllezërit në bashkëpunim me njëri-tjetrin, pas një konflikti të çastit, për motive të dobëta kanë tentuar të vrasin me sende të forta, M.Sh., 36 vjeç, banues në Katund Sukth, i cili ka marrë goditje në gjoks dhe Sh.Sh., 28 vjeç, banues në Katund Sukth.
Si pasojë e dëmtimeve të marra 36 vjeçari ndodhet në Spitalin Ushtarak Tiranë në gjendje të rëndë shëndetësorë, ndërsa Sh.Sh., ndodhet në Spitalin e Durrësit jashtë rrezikut për jetën.
Mësohet se si të dyshuarit edhe të plagosurit ishin duke pirë bashkë në një lokal, kur pas një konflikti të çastit kanë nisur grindjen mes tyre, e cila përfundoi me përdorimin e mjeteve të forta dhe plagosjen e dy prej tyre.
Nga ana e uniformave blu materialet i kaluan Prokurorisë së Durrësit për ndjekje të mëtejshme për veprën penale “Vrasje me dashje e mbetur në tentativë në bashkëpunim”.
