Real Madrid, kampion Europe për të 11-ën herë në histori. Los Blancos nuk tregojnë mëshirë duke rrëzuar sërish në finale Atleticon e Madridit në 120 minutëshin e Milanos pas një ndeshjeje heroike ku “Los Colchoneros” u dorëzuan vetëm nga lotaria e 11-metërshave. 1-1 përfundoi koha e rregullt dhe shtesa, ndërsa në verdiktin final, të besuarit e Zidane nuk gabuan asnjë tentativë përballë Atleticos ku Juanfran dënoi skuadrën e tij.
Reali zbriti në fushë me tredhëmbëshin Bale-Benzema-Cristiano Ronaldo, ndërsa Atletico me dyshen e sulmit Torres-Griezman. Minutat e para i mbërthyen skuadrat në mesfushë duke mos rrezikuar pothuajse asgjë por në të 6-ën Oblak rezultoi vendimtar me pritjen e goditjes së Benzema. Me kalimin e minutave nervozizmi u rrit dhe ndeshja u duk e bllokuar por në të 15-ën, Sergio Ramos mjaftoi me një prekje të lehtë edhe pse në pozicion të dyshimtë, për të dënuar rivalët me një gol shumë të rëndësishëm që e fuqi sfidën në një rrugë pa kthim. Pas disavantazhit, “Los Colconeros” besuan te kontrolli i topit duke lëshuar disa shkëndija të vakëta me Griezmann por pa dhënë sinjale të rrezikshme në portën e Keylor Navas. Pak sekonda pas rikthimit të skuadrave në fushën e lojës, ishte Fernando Torres ai që u pengua në zonën e rreptësisë nga Pepe dhe për kryesorin Klatenburg nuk kishte dyshime, 11-metërsh. Griezman mori përsipër ekzekutimin por pesha e madhe e përgjegjësisë rëndoi këmbët e francezit që e stampoi topin në transversë.
Mallkim për Atleticon që nuk arriti të gjente rrugën e rrjetës, ndërsa Zidane mori frymë i lehtësuar. Gjithsesi, dominimi i Atleticos u bë asfiksues dhe në të 54-ën, Savic ishte shumë pranë barazimit por topi kaloi ngjitur me shtyllën e djathtë të Keylor Navas. 5 minuta më pas ishte radha e Saul për të gabuar në finalizim, ndërsa Reali u zgjua 20 minuta nga fundi me një rast të artë që nuk u shndërrua në gol nga Benzema. Në të 78-ën, ishte sërish Oblak që shpëtoi Atleticon pas goditjes së Cristiano Ronaldos, ndërsa në aksionin pasardhës, një kombinim perfekt mes Gabit, Juanfran dhe Carracsos u finalizua në gol. 1-1 dhe finalja e 2 viteve më parë u përsërit në Milano me të dyja skuadrat që iu drejtuan kohës shtesë. 30 minutat nuk ndryshuan asgjë në rezultat dhe skuadrat iu drejtuan për drejtësi pikës së bardhë, aty ku Juanfran e ndali topin në shyllë ndërsa Cristiano Ronaldo shënoi 11-metërshin që fiksoi shifrat në 5-3. Festë për skuadrën më legjendare të Madridit dhe shumë lotë për Atleticon që dështon për të dytën herë në finalen derbi./supersport.al/
