Statuti i Asociacionit të komunave me shumicë serbe, përfshirë çdo ndryshim që do të bëhet pasi ai të hyjë në fuqi, pritet të kalojë përmes Gjykatës Kushtetuese të Kosovës.
Zëvendësministri i Administrimit të Pushtetit Lokal, ka thënë për KTV-në se ka pasur takime ndërmjet ekspertëve juridikë dhe kryeministrit dhe po punohet në një udhëzim administrativ që i hap rrugë dekretit qeveritar për Asociacionin.
Bajram Gecaj ka shtuar se ky dekret do t’i dërgohet Gjykatës Kushtetuese për vlerësim dhe tek pas kësaj nis puna për statutin e Asociacionit.
Zëvendësministri ka shtuar se ata kanë punuar shumë, në mënyrë që ky Asociacion të mos ketë kompetencë ekzekutive e as të ketë lëshime në gjuhën juridike për këtë.
Statuti i AKS-së pastaj me një udhëzim tjetër administrativ do të dërgohet në Kushtetuese për të vlerësuar nëse është në përputhje me Kushtetutën e Kosovës, përcjell koha.net.
Gecaj nuk ka dashur t’i komentojë deklaratat e shefit të tij, ministrit Lubomir Maric, i cili ka thënë se tashmë po punohet në statutin e Asociacionit dhe këtë po e bëjnë ekspertë serbë e ndërkombëtarë.
Në bazë të marrëveshjes, ekipi menaxhues ka kohë 4 muaj që ta përgatisë Statutin e Asociacionit, i cili prezantohet në dialogun e nivelit të lartë në Bruksel.
