Trupi i pa jetë i policit të vrarë dje në Skenderaj, Valon Gogjuli, ende nuk është sjellë nga autopsia në shtëpinë e tij.
Burime të Indeksonline bëjnë të ditur se ai do të varroset në fshatin Makërrmal, posa të përfundohen këto procedura.
Ndërsa Arsim Gërxhaliu, drejtor i Departamentit të Mjekësisë Ligjore, ka thënë se autopsia e Gogjulit do të përfundojë për pak orë.
“Procedurat do të përfundohen sot. Rasti ka ndodhur dje masdite, deri sa të ftohet trupi, pastaj fillon të bëhet autopsia. Brenda pak kohe pritet të përfundojë. Sot do të lëshohet”, ka thënë Gerxhaliu për Indeksonline.
Valon Gogjuli u vra pasditen e djeshme nga familja Birinxhiku, pasi të dy kishin pasur një mosmarrëveshje në vitin 2013, me ç`rast Valoni pati vrarë Bekim Birinxhikun.
Goxhuli kishte përdorur armën, kur Bekim Birinxhiku e kishte sulmuar policin me një shufër metalike, pavarësisht paralajmërimeve të këtij të fundit se ishte oficer policie.
Një plumb e kishte rrokur sulmuesin në kokë, dhe gjykata e cilësoi këtë rast, si vrasje në mbrojtje të nevojshme.
Ndërsa, burime gjithashtu, bëjnë të ditur se miku i cili u plagos dje, në veturë bashkë me Valonin, vazhdon të jetë në gjendje të rëndë shëndetësore.
