Kreu i Partisë së Drejtësisë, Ferid Agani u ka dërguar shkresë të gjithë kryetarëve të degëve që të organizojë mbledhjet e Kryesive dhe të përcaktojnë datën e Kuvendit ku do të debatohet për vërejtjet që janë drejtuar ndaj tij.
“Unë dje e kom drejtuar me shkresë të gjithë kryetarëve të këtyre degëve dhe të gjitha Kryesive kërkesën që t`i organizojnë mbledhjet e Kryesive dhe në to ta përcaktojnë datën e Kuvendeve ku do të mund të debatojnë për vërejtjet që i kanë dhe të shohim se a do të kenë këta kryetarë mbështetje të Kuvendeve apo jo”, ka sqaruar Agani në një prononcim për Indeksonline.
Lidhur me kërkesën e tij për shkarkim, ai ka thënë se nuk ka marrë asgjë me shkrim për këtë.
Agani e sheh si të çuditshëm faktin se si kundërshtimet kanë nisur pas ngritjes së akuzës ndaj tij për rastin “Stenta”, derisa sqaron se para kësaj gjithçka brenda partisë ka qenë në rregull.
“Vetëm 3-4 javë mbrapa Kuvendit të partisë kanë filluar këto pakënaqësi. Më herët kemi mbajtur Kuvendin e Punës dhe ka qenë një Kuvend i unitetit se si të shkojmë përpara bashkë. Bëhet fjalë për një grup të individëve që për qëllimet e tyre politike nuk e kanë marrë mbështetjen e kryesive që është obligative, sepse kjo nuk është parti private”, ka sqaruar ai tutje.
Sipas Aganit, komunikata e lëshuar dje nga Sekretari i Përgjithshëm i PD-së, Fidan Mustafa nuk i paraqet qëndrimet zyrtare të partisë, ngaqë ai ishte pezulluar për shkak të veprimeve kundër statutit.
