E plotësuar: Edhe deputetja e Aleancës për Ardhmërinë e Kosovës (AAK), Donika Kadaj- Bujupi, ka thënë se më 26 qershor Kuvendi ka marrë një vendim për Gjykatën Speciale, dhe sipas saj, sipas nenit 4 të Kushtetutës së Kosovës, Qeveria obligohet që t’i respektojë vendimet e Kuvendit të Kosovës.
Ai ka theksuar se Qeveria e Kosovës po e shfrytëzon arrogancën e numrave për ta riproceduar çështjen e amendamenteve të Gjykatës Kushtetuese.
“Është e vërtetë që kemi një seancë të re, ku kemi pikë të veçantë të rendit të ditës ndryshimet kushtetuese. Paraprakisht është dashur që të respektohet e grithë procedura që nga fillimi. Nëse është marrë një vendim dhe ka filluar procedura nga fillimi, dhe pse nuk po respektohen edhe procedurat e reja. Në njërën anë po thoni po i riprocedojmë amendamentet, në anën tjetër po i shkelni procedurat. Kryetar, mos e shkelni Kushtetutën dhe mos e merrni përgjegjësinë dhe barrën për këto shkelje. Jo gjithmonë do të shkoj kështu në një moment do të sfidohet ky kuvend dhe nuk e është mirë që kryetari ta bart këtë barrë”, ka thënë Kadaj- Bujupi. /Telegrafi/
Edhe deputetja e Lëvizjes Vetëvendosje (LVV), Albulena Haxhiu, në foltoren e Kuvendit kundërshtoi riprocedimin e amendamenteve, që i hap rrugë krijimit të Gjykatës Speciale.
Sipas saj, është obligim kushtetues i kryetarit të Kuvendit që çfarëdo amendamenti ta dërgoj në Gjykatën Kushtetuese.
“Meqë kryetari nuk e ka respektuar këtë dispozitë, a është i vetëdijshëm ai që me këtë veprim po shkelet Kushtetua e Kosovës. A jeni i vetëdijshëm që keni përgjegjësi kushtetuese. Ju po lejoni nëpërkëmbjen e Kuvendit si të ishit ministri i 22-të i Isa Mustafës. Po shkelen të gjitha rregullat me veprimet arbitrare të ndërmarra. Po anashkalohen të gjitha organet e Kuvendit, dhe çfarë kuptimi ka Kuvendi nëse funksionon kështu. Kërkoj të respektohen të gjitha procedurat për këtë amendament. I njëjti duhet të shkoj në Gjykatën kushtetuese për vlerësim”, ka thënë Haxhiu.
Ndërkaq, Teuta Sahatçiu nga LDK tha se nuk ka shkelje të Kushtetutës me riprocedimin e amendamenteve për ndryshime kushtetuese. Ajo tha se kjo pikë e rendit të ditës është aprovuar edhe në Kryesinë e Kuvendit të Kosovës. /Telegrafi/
Veseli: Nuk ka shkelje të procedurave
E plotësuar: Ka filluar seanca plenare e Kuvendit të Kosovës në të cilën pritet të shqyrtohet dhe votohet ndryshimi kushtetues që i hap rrugë Gjykatës Speciale.
Kryetari i Kuvendit të Kosovës, Kadri Veseli tha se me riprocedimin e amendamenteve për ndryshime kushtetuese që i hapin rrugë krijimit të Gjykatës Speciale nuk po bëhet shkelje e procedurave.
Deputetët e ambasadorë fillojnë të hyjnë në Kuvend
Tanimë deputetët e subjekteve politike kanë filluar të hyjnë në ndërtesën e Kuvendit të Kosovës, ku sot do të shqyrtohet dhe votohet ndryshimi kushtetues që i hap rrugë Gjykatës Speciale.
Deputetët e parë që u panë duke hyrë në ndërtesën e Kuvendit të Kosovës janë Nuredin Ibishi, Elmi Reqisa, Pal Leka, Nait Hasani. Ndërkohë, mediat nuk po lejohen të hyjnë në ndërtesën e Kuvendit deri në ora 9:40, edhe pse PDK ka paralajmëruar një takim të grupit në ora 9:30.
Ndërkohë, edhe ambasadorja e Francës dhe ai i Italisë tashmë kanë hyrë në Kuvendin e Kosovës. /Telegrafi/
