Kryeministri i vendit, Isa Mustafa, ka deklaruar se veprimi i sotëm i opozitës, duke e sulmuar atë me vezë, nuk është shenjë e mirë për demokracinë.
Ai, në një emision të televizionit publik, ka thënë se deputetët duhet të reflektojnë kulturë demokratike, për hapësirë në dialog për këmbim të mendimeve.
“Me faktin që ekziston Kuvendi do të thotë se të gjitha palët nuk kanë mendime të njëjta. Unë sot isha në Kuvend të raportoja ashtu siç ka qenë e definuar pika e rendit të ditës para deputetëve dhe qytetarëve të vendit për të gjitha elementet e marrëveshjes së Brukselit, por për fat të keq kjo mu pamundësua, ndonëse askush nuk ka të drejtë që t’ia mohojë kryeministrit që të sqarojë para qytetarëve. Kjo nuk është një shenjë e mirë por mendoj se është një fazë që do të tejkalohet shumë shpejt”, ka thënë Mustafa.
“Mendoj se nuk kemi dhënë asnjë arsye, sepse nuk e kemi filluar sivjet dialogun për Asociacionin. Për këtë është dialogu në vitin 2013 dhe atëherë Kuvendi ka dhënë pajtimin për marrëveshjen e parë. Në prill 2013 është arrit marrëveshja e parë ndërsa në qershor 2013 Kuvendi me 84 vota e ka votuar ligjin për ratifikimin e marrëveshjeve ndërkombëtare”, ka thënë kryeministri.
Sa i përket asaj që opozita kërkon anulimin e plotë të marrëveshjeve për asociacionin dhe për demarkacionin me Malin e Zi, Mustafa është shprehur: “Nuk ka kthim në pikën zero në asnjë marrëveshje, sepse nuk kthehet në pikën zero ligji për ratifikimin e marrëveshjes, ai është ligj i cili detyron edhe pozitën edhe opozitën”.
“Marrëveshjet e arritura i kontribuojnë stabilitetit në vend, në rajon dhe rrugës tonë në integrimin evropian dhe t’i hapim proceset më shpejt integrimet”, deklaroi Mustafa.
