Dardan Molliqaj, duke folur në Rubikon të KTV-së, ka diskutuar edhe në lidhje me raportin në mes të partisë së tij dhe Ilir Dedës pas deklarimeve të tij të fundit kundër veprimeve të VV-së.
“Ilir Deda ka një proces të gjatë të diskutimeve për kalimin e tij në Vetëvendosje. Ai është pajtuar me tri koncepte të VV-së, programin, metodat dhe konceptin, për të cilat vazhdon të pajtohet. Por, ka nja dy protesta që s’i kanë pëlqyer. Edhe pse s’mendoj se është mirë që dikush të mos pajtohet me shumicën… Megjithatë, nuk e kemi prioritet çështjen Deda. Është krejtësisht e parëndësishme në raport me “Zajednicën”. Ai s’ka arsye që të del nga VV”, u shpreh Molliqaj, duke theksuar se “Deda është kundër “Zajednicës””.
Molliqaj: VV duhet ta ndërrojë pushtetin në Kosovë
Sekretari i Lëvizjes Vetëvendosje, i ftuar në emisionin Rubikon të KTV-së, ka folur në lidhje me veprimin e sotëm të opozitës në Kuvend kur deputetët e opozitës hodhën vezë në drejtim të kryeministrit Isa Mustafa derisa ai po raportonte në lidhje me marrëveshjet e fundit në Bruksel me Serbinë.
Ai tha se ata nuk kanë nevojë për raportimet e kryeministrit pasi që thotë se e kanë lexuar tekstin.
“Nuk kemi nevojë për raportime sepse e kemi lexuar tekstin. Deklarimet shabllone të kryeministrit se kjo është në përputhje me ligjet e Kosovës nuk mund t’i pranojmë”, ka thënë Molliqaj në Rubikon të KTV-së.
“Alternativa jonë është e qartë: së pari nuk duhet të kemi negociata me Serbinë pa na njohur si shtet, pa kërkuar falje, pa i gjetur të zhdukurit dhe pa i paguar dëmet e luftës”, thekson Molliqaj.
“Në raport me serbët në Kosovë: integrimi i serbëve në Kosovë duhet të bëhet përmes dialogimit me ta”, ka thënë sekretari i VV-së.
Ai tha se integrimi i serbëve duhet të bëhet nga shteti, e jo nga deputetët.
“VV duhet ta ndërrojë pushtetin në Kosovë. E patëm një rast, por e humbëm për fajin e zotëri Isa Mustafës. Mustafa vazhdoi rrugën e zotit Thaçi, por kjo rrugë është e gabuar. Pushteti duhet të tërheqë nënshkrimin nga ajo marrëveshje”, thotë ai në Rubikon.
“Kërkesa jonë aktuale është që kryeministri, përkatësisht qeveria, t’i tërheqin nënshkrimet nga këto marrëveshje e cila do të hapte rrugë për një platformë të përbashkët me opozitën karshi dialogimit me Serbinë”.
