Nait Hasanin dhe Ganimete Musliun nuk ka asnjë njeri që mund t’i bindë që t’i thonë Po themelimit të Gjykatës Speciale. Këta dy deputetë të Partisë Demokratike të Kosovës, nuk kanë ndryshuar qëndrimet e tyre as pas gati një muaji kur i thanë Jo votimit të ndryshimeve të amendamenteve Kushtetuese që do t’i hapnin rrugë Gjykatës Speciale.
Derisa Hasani dhe Musliu qëndrimet e tyre i kanë shprehur publikisht, kolegët e tyre që në seancën e 26 qershorit votuan si ata, ato i mbajnë për vete. KosovaPress ka kontaktuar disa prej tyre, por nuk kanë dashur të tregojnë se a do të votojnë kundër apo për këto ndryshime.
Megjithatë, janë 81 vota që i japin dritën e gjelbër ndryshimeve kushtetuese për themelimin e Gjykatës Speciale. Koalicioni qeveritar i ka gjithsej 88 deputetë.
Deputetit Nait Hasani thotë se të hënën do të jetë në seancë, por që përsëri do të votojë kundër ndryshimeve Kushtetuese.
Në një prononcim për KosovaPress, ai madje ka thënë se pret që ta ndërrojnë mendjen edhe kryeministri Isa Mustafa dhe zëvendëskryeministri Hashim Thaçi.
Qëndrim të njëjtë me kolegun nga partia e ka edhe Ganimete Musliu.
“Sigurisht se do të votoj, por njëjtë sikur herën e kaluar kundër”, tha Musliu.
Derisa herën e kaluar kishte votuar kundër, Rafet Rama tashmë është i pavendosur. Ai tha se do të vendosë në takimin e Grupit Parlamentar që do të mbahet të hënën.
“Ende nuk kam vendosur a do ta votoj apo jo”, tha Rama.
Ajo që ka vendosur që moti për këtë çështje, është Flora Brovina.
“Për themelimin e kësaj Gjykate unë kam vendosur kaherë, qysh para tri viteve kur ka filluar të flitet për këtë çështje. Qëndrimet e mia nuk kanë ndryshuar”, tha Brovina.
Deputetja më e vjetër e Parlamentit, seancën e kaluar kishte abstenuar nga votimi për ndryshimet kushtetuese.
KosovaPress ka kontaktuar edhe deputetët tjerë që kanë votuar kundër në seancën e kaluar, por disa nga ta nuk e kanë hapur telefonin, ndërsa Xhevahire Izmaku dhe Fadil Demaku nuk kanë dashur që të flasin për këtë çështje.
Të paqasshëm në telefon gjatë së shtunës kanë qenë edhe Fadil Beka dhe Nezir Çoçaj, KosovaPress nuk ka mundur të kontaktojë as Blerta Deliun e cila më 26 qershor nuk e ka shfrytëzuar të drejtën e votës, duke hequr nga funksioni kartelën e votimit.
KosovaPress ka mësuar se Blerta Deliu dhe Xhevahire Izmaku kësaj radhe do të votojnë pro ndryshimeve.
Partnerët e koalicionit, PDK-LDK, bashkë me minoritarët, duhet të sigurojnë 2/3 e votave apo 81 sosh për miratimin e këtyre amendamenteve që i hapin rrugë krijimit të Speciales, derisa për miratimin e Projektligjit për Dhomat e Specializuara dhe Mbështetje financiare nevojiten vetëm 61 vota.
Në seancën e 26 qershorit, 75 deputetë votuan për, 7 kundër dhe 2 abstenuan, që në total i bie të votojnë 84 deputetë, nga 88 sa i ka gjithsej koalicioni PDK- LDK dhe minoritetet.
