Kryeprokurori i Kosovës Aleksandër Lumezi ka mbajtur një konferencë për media në lidhje me përgjimet e Adem Grabovcit që u publikuan nga portali Insajderi.
Lumezi tha që nuk ka bazë për aktakuzë “pronto2” por do të punohet për të gjetur prova të reja. Ai theksoi se askush nuk është mbi ligjin dhe për këdo që do të gjenden prova, menjëherë do të hetohen, raporton Gazeta Express.
“Në këtë moment nuk kemi të gjitha të dhënat e duhura andaj mund të jetë e parakohshme të veprojmë në lidhje me rastin. Mirëpo siguroj se do të shikojmë këtë rast dhe askush nuk është i paprekshëm. Nëse gjejmë se ka një gjë të vetme lidhur me ndonjë vepër penale ne do ta nxjerrim para ligjit. Ne jemi të gatshëm të kemi idenë fillestare si do të veprojmë me rastin. Ftoj qytetarët mediat dhe të tjerët që të kenë durim dhe të lejojnë organet e ndjekjes të bëjnë punën e tyre të pavarur. Ne sigurojmë edhe njëherë se rasti do të trajtohet dhe nëse gjejmë prova të mjaftueshme ne do të procedojmë sipas ligjit” deklaroi Lumezi.
Lumezi gjithashtu tha se këto përgjime janë të vitit 2011 janë prova të vjetra të cilat më parë i ka përdorur edhe prokurori i EULEX-it i cili i ka bërë përgjimet./GazetaExpress
