Kryetari i Drenasit, Ramiz Lladrovci i cili fitoi edhe një mandat tjetër qeverisës për këtë komunë, ka falënderuar qytetarët e Drenasit e simpatizantët e PDK-së, për angazhimin e pakursyer që bënë në kuadër të fushatës zgjedhore.
Lladrovci edhe njëherë para qytetarëve të tij të Drenasit, ka potencuar se PDK është Forca e ndryshimit në këtë komunë ndërsa u shpreh falënderues ndaj bashkëpunëtorëve të shtabit të tij zgjedhor në këtë komunë, njofton Klan Kosova.
”Sot ishte ditë e madhe për mua, për Familjen time dhe për të gjithë qytetarët që i besuan Forcës së Ndryshimit.
Faleminderit qytetarëve të Drenasit, aktivistëve dhe simpatizantëve të PDK-së, strukturat organizative, seksioneve, nëndegëve të PDK-së, Rinisë dhe Gruas Demokratike për angazhimin e pakursyer gjatë gjithë fushatës.
Një falënderim të veçant shpreh për bartësin e Listës së PDK-së, Labinot Halilajt, i cili me durim përballoi sfidën e garës, si dhe dy nënkryetarët e Shtabit, Milaim Hajdarin dhe Arsim Haxhiun. Po ashtu, respekt për të gjithë kandidatët për Asamble që me përkushtim u përpoqen për çdo votë.
Përpara nesh është një mandat i sprovës dhe dëshmisë, sepse, ne e mbajmë fjalë. Ne jemi Forca e Ndryshimit në Drenas!
Sinqerisht falënderoj Kryetarin Veseli dhe të gjithë bartësit e përgjegjësive shtetërore në Kosovë, Maqedoni, Mal të Zi dhe Shqipëri, për urimet e sontme.
Falënderoj po ashtu, Nënën Zizë, e cila me 98 vitet e saja, jo vetëm që doli të votonte, por edhe më dhuroi një palë çorapë leshi që vet i kishte thurë. Këtu falënderoj edhe Bacën Ymer, 93 vjeçar dhe Nënën Adile, 90 vjeçare nga Fushtica e poshtme që më nderuan me besimin e tyre për mandatin e ardhshëm. Faleminderit!”
