Lidhja Demokratike e Kosovës ka reaguar në lidhje me disa deklarata të kryetarit të Prishtinës, Shpend Ahmeti, për çështjen e Demarkacionit. Sipas LDK-së, Ahmeti është përgjegjës për vdekje dhe plagosje të qytetarëve ditëve të fundit në kryeqytet.
Partia e kryeministrit Isa Mustafa, konsideron se kryetari i Prishtinës deri më tani mban përgjegjësi për humbje të jetëve të pafajshme, si dhe plagosjen e disa njerëzve në kryeqytet gjatë festivalit të birrës, si shkak i keqmenaxhimit të qytetit.
“Kryetari i Komunës së Prishtinës, i cili deri më tani mban përgjegjësi për humbje të jetëve të pafajshme dhe plagosjen e 50 njerëzve në Prishtinë për shkak të keqmenaxhimit të qytetit, po shpreson që dështimet e tij në Komunë të mbulohen nga ndonjë “revolucion” eventual në nivel qendror”, thuhet në reagim.
Ahmeti, sipas LDK-së, “vetëm brenda javës së kaluar për shkak të paaftësisë dhe papërgjegjësisë lejoi dy skandale, së pari duke lënduar dhjetëra të rinj në qendër të qytetit si dhe duke rrezikuar jetën e banorëve të një lagjeje të tërë për shkak të rrëshqitjes së asfaltit, del sot me të pavërteta për procesin e demarkacionit të kufirit”.
Reagimi i plotë i LDK-së:
Kryetari i Komunës së Prishtinës, i cili deri më tani mban përgjegjësi për humbje të jetëve të pafajshme dhe plagosjen e 50 njerëzve në Prishtinë për shkak të keqmenaxhimit të qytetit, po shpreson që dështimet e tij në Komunë të mbulohen nga ndonjë “revolucion” eventual në nivel qendror.
Ahmeti, i cili vetëm brenda javës së kaluar për shkak të paaftësisë dhe papërgjegjësisë lejoi dy skandale, së pari duke lënduar dhjetëra të rinj në qendër të qytetit si dhe duke rrezikuar jetën e banorëve të një lagjeje të tërë për shkak të rrëshqitjes së asfaltit, del sot me të pavërteta për procesin e demarkacionit të kufirit.
Por, qytetarët e Prishtinës dhe të krejt Kosovës e dinë se kush ka të drejtë: institucionet shtetërore, përfaqësuesit legjitim të tyre, miqtë amerikanë dhe ekspertët e mirëfilltë e të papolitizuar, apo njerëzit që kanë në ndërgjegjen e tyre humbje jetësh si pasojë e keqmenaxhimit, uzurpatorë tokash, njerëz të akuzuar për falsifikim dhe keqpërdorim mjetesh financiare, përfitues politikë apo njerëz të ngjashëm.
Qytetarët e Prishtinës dhe krejt Kosovës janë përcaktuar për rrugën euroatlantike, për lëvizjen e lirë në BE, për transformimin e FSK-së në Ushtri të Kosovës, për progresin ekonomik e jo për radikalë politikë që janë në gjendje të djegin policë, institucione, shtëpi private, për agjenda antiperëndimore të një kryetari komune i cili për synime karrieriste dhe në shërbim të klientelës së vet po bënë çdo përpjekje që të dëmtojë interesat e qytetarëve dhe të shtetit të Kosovës.
Shpend Ahmeti, duke qenë i diskredituar moralisht, profesionalisht dhe politikisht, nuk ka kredibilitet të flas më as për Komunën e Prishtinës se lëre më për çështje që lidhen me Kosovën.
