Shkëlqim Ajdini
Tani e disa vite mund të themi që qyteti historik i Kaçanikut po pasqyrohet në mediumet tona si një vend që nuk ka të bëjë me realitetin në Kosovë. Po, po, deri në këtë masë ka shkuar lapsi i gazetarëve tanë dhe yryshi për të siguruar klikime në internet, e që këto klikime shndërrohen ne para. Po e kuptoni që në fillim, se nuk po flasim më për etikë gazetarie, por thjeshtë për versionin tallava të disa mediumeve që kanë degraduar në këtë aspekt shumë të rëndësishëm.
Qyteti i Kaçanikut, ani pse përballet me vështirësi ekonomike të theksuar, por sikur mos të mjaftonte kjo, tanimë ka marrë epitete të paqena dhe të pamerituara. Kaçaniku i Betejës së Grykës së Kaçanikut, i Kushtetutës, i betejave të UÇK-së, sot është thumbuar si Kaçaniku i “xhihadistëve”. Jam i sigurt që shumë mediume nuk e dijnê kuptimin e mirëfilltë të fjalës “xhihad”. Pa çka se, edhe në kontekstin që e përdorin, nuk i përshtatet Kaçanikut. Një person apo qofshin edhe disa, nuk përfaqësojnë vlerat reale të një mentaliteti të një qyteti. Kjo është thelbësore.
Fatkeqësisht, kësaj i ka shërbyer edhe neglizhenca e institucionit të Komunës së Kaçanikut, që nuk e pa asnjëherë të arsyeshme të demantoj cilësimet e këtij lloji. Të organizoj ndonjë tubim që do të reflektonte të vërtetën e jetesës dhe realitetit në Kaçanik.
Megjithatë, nuk është vonë. Nëse Komuna e Kaçanikut nuk merret me këtë, askush nuk iu pengon atyre që kanë krijuar paragjykime ndaj Kaçanikut që të vijnë, t’ia bëjnë një xhiro nê bulevard rreth lumit, e pse jo të pijnë çaj Kaçaniki, dhe të shohin se në Kaçanik zhvillohet jetë normale si në shumicën e vendeve të Kosovës, pëjashtim pakënaqësive për papunësi e jetesë të vështirë, por kjo për faj të instancave përkatëse. E kur jemi te vështirësitë ekonomike, me të cilat përballen kaçanikasit, asnjëherë nuk pash që mediumet të shkruajnë me po të njëjtin elan, për Shoqatën Humanitare Kaçanikase. Shoqatë kjo që, me ndihmën e biznismenëve vendës dhe të diasporës, ka marrë shumë iniciativa duke ndihmuar familje të ndryshme në nevojë, dhe jo vetëm në Kaçanik.
Gazetaria është mision i shenjtë, kërkon përgjegjësi e profesionalizëm. Gërshetimi i tyre sjell lajm dhe vlerë. Uroj të shoh shumë vlera reale në mediumet tona.
(Autori: gazetar dhe njohës i zhvillimeve fetare)
