Kryetari i Kuvendit të Kosovës, Kadri Veseli është ndër të vetmit zyrtarë të lartë të shtetit i cili ka heshtur në raport me marrëveshjen e nënshkruar në Bruksel për themelimin e Asociacionit të Komunave Serbe.
Heshtja e Veselit, spikat për shkak të rreshtimit në favor të marrëveshjes të zyrtarëve të tjerë kryesor të shtetit, dhe kundërshtimit të fuqishëm nga opozita, me përjashtim të AAK-së.
Në momentin e parë të dakordimit marrëveshjes i kishte ndërtuar një “korridor” mbrojtës Presidentja e vendit, Atifete Jahjaga. Asaj i janë bashkangjitur pastaj edhe Ministri i punëve të jashtme, Hashim Thaçi me “ekipin e tij” si dhe vet Isa Mustafa.
Reagim të partive që sot janë në pushtet nuk ka pasur fare. Madje po të mos ishte Thaçi dhe Jahjaga, kryeministri Isa Mustafa ka mbetur i vetmuar në këtë drejtim.
Një reagim zyrtarë, ndonëse kjo çështje është bërë temë e nxehtë mediale dhe në opinion, nuk ka dhen fare partia që udhëheqë me qeverinë- Lidhja Demokratike e Kosovës.
Ndonëse Mustafa edhe më emër është sulmuar nga Vetvendosje edhe me goditje nën brez madje, asnjë nga figurat kryesore të partisë nuk janë deklaruar. Në shpjegim dhe mbrojtje të AKS ka dalë vetëm miku i tij Muhamet Mustafa.
Ndonëse Veseli si kryetar i Kuvendit, nuk është i ndërlidhur direkt me këtë qështje, heshtja e tij është e papritur shkaku se ai në vazhdimësi ka qenë figura balancuese jo vetëm brenda koalicionit, por edhe ka pasur një tentim të qetësoj debatin publik.
E debati publik për këtë çështje është jashtëzakonisht i ngarkuar.
E çuditshme në kampin opozitarë është edhe heshtja e AAK-së e cila kohëve të fundit ka ndërtuar një identitet goxha agresiv opozitarë në një varg çështjesh. Jashtë këtij prizmi, pra aktivitetit të kundër çdo vendimi, heshtja e Ramush Haradinajt nuk do duhet të jetë e çuditshme, për faktin se ajo ka qenë mbështetëse e zëshëm e krijimit të ASK-së gjatë mandatit të kaluar si dhe e ka mbështetur këtë çështje në Kuvend të Kosovës.
Jashtë çdo konspiracioni, dhe madje edhe mundësisë së arsyeve krejt të parëndësishme ndoshta që sjellin deri te ajo, edhe heshtja është një deklarim në vete dhe nëse asgjë e vlen te shënohet e nënvizohet. /Gazeta Blic/
