Hoti thotë se organizatat buxhetore po e shkelin ligjin e prokurimit publik

E publikuar: 15/03/2015 14:06
Rreshtat+- AShkronjat+- Printo

Ministri i Financave, Avdullah Hoti, ka thënë se gjendja është brengosëse se si po shfrytëzohet paraja publike. Në një komunikatë për media dërguar të dielën nga Ministria që udhëheqë Hoti, sqarohet se ministri ka pranuar raportin vjetor për vitin 2014 nga Organi Shqyrtues i Prokurimit (OSHP) lidhur me aktivitetet e prokurimit për vitin 2014.

Sipas tij, shumë organizata buxhetore, në 537 raste të raportuara, nuk kanë respektuar ligjin e prokurimit publik, ka pasur parregullsi në vlerësimin e ofertave, në marrjen e vendimeve të gabuara për fituesit, në trajtim jo të barabartë në ofertuesve, në dosjet e tenderit, specifikimet teknike, kritere për dhënie të kontratës dhe shkelje të tjera.

“Prej këtyre 537 ankesave, për shkak të shkeljeve të ligjit të prokurimit, në 162 raste janë detyruar organizatat buxhetore të bëjnë rivlerësim të ofertave, ndërkaq në 104 raste janë detyruar të ri-tenderojnë projektin. Vlera e mjeteve financiare të involvuara në këto tenderime nuk është bërë e ditur në raport”, thotë Hoti.

Sipas tij, kjo gjendje shtron nevojën për intervenim urgjent në dy drejtime, në drejtim të ndryshimit të ligjit të prokurimit publik dhe në ngritjen e kapaciteteve dhe etikës profesionale të zyrtarëve të prokurimit në të gjitha organizatat buxhetore.

“Unë jam i vendosur që të sigurojë se paraja publike po përdoret sipas ligjit dhe në interesin më të mirë të qytetarëve. Ashtu siç kam deklaruar me rastin e marrjes së detyrës, do të jem plotësisht transparent për shpenzimin e secilit cent të parasë publike dhe do të kërkoj llogari nga cilido zyrtar publik”, thotë ministri Hoti.

Sipas tij, në javët në vijim, Ministria do ta dërgojë ligjin e prokurimit publik në Qeveri dhe pastaj në Parlament.

“Ligji do të përcaktojë rregullat e reja të prokurimit publik dhe do të forcojë llogaridhënien dhe transparencën. Njëkohësisht, po punojmë në përgatitjen e platformës elektronike për të filluar zbatimin e prokurimit elektronik në të gjitha organizatat buxhetore. Kjo do të rrisë në maksimum transparencën gjatë procesit të tenderimeve dhe do të shkëpusë kontaktet e zyrtarëve të prokurimit me ofertuesit. Po ashtu, me këtë sistem elektronik, çdo veprim i zyrtarëve të prokurimit do të jetë i gjurmueshëm në sistem duke rritur kështu përgjegjësinë dhe adresuar atë tek personi adekuat”, thotë ministri Avdullah Hoti.