Lideri i Aleancës për Ardhmërinë e Kosovës, Ramush Haradinaj, ka mirëpritur vendimin e Gjykatës Kushtetuese për Asociacionin e komunave me shumicë serbe, duke thënë se është vendim lehtësues.
Në një postim në rrjetin social Facebook, Haradinaj ka shkruar se ndjen keqardhje që vendi është dashur të vijë deri në këtë situatë nga një marrëveshje e keqe për Kosovën.
“Vendimi i sotëm i Gjykatës Kushtetuese është një vendim lehtësues. Më mirë vonë se kurrë, por nuk kam si të mos shpreh keqardhjen time pse u dasht të kalohet gjithë ajo rrugë e mundimshme që një marrëveshje e keqe për vendin, të konstatohej se është në kundërshtim me kushtetutën, me disa muaj vonesë”, ka shkruar Haradinaj.
“Ky vendim po ashtu e përsërit modelin që zyrtarët e lartë të këtij shteti në vazhdimësi e shkelin kushtetutën. Ky është një presedan i keq që duhet të marrë fund njëherë e përgjithmonë. Këtë vendim e konsideroj fitore të qytetarëve të Kosovës pavarësisht bindjeve politike”, ka shkruar veç të tjerash Haradinaj.
