Deputeti i Kuvendit të Kosovës, Daut Haradinaj, në Info Magazine të Klan Kosovës ka thënë se do të kishte qenë mirë që sot të mos hiqej nga rendi i ditës marrëveshja për demarkacionin me Malin e Zi, por të procedohej, të dështonte dhe i gjithë procesi të kthehej në “pikën zero”.
“Marrëveshja e sotme nuk u tërhoq për shkak të mungesës së kuorumit, por për shkak të numrit të marrëveshjes së koalicionit. Kjo qeveri nuk i kishte numrat për demarkacion dhe as nuk do t’i ketë në të ardhmën. Edhe sot e besoj që është thjeshtë, ata duhet të shkarkojnë komisionin fillojnë negociata të reja, ose mund të shkojnë në arbitrazh. Por jam shumë i sigurt që partnerëve të koalicionit, iu mungojnë numrat në Kuvend. Europa na ka hyrë në hak që na ka lanë të kushtëzuar tash e 16 vite”.
Ai më tutje ka kërkuar nga Qeveria e Kosovës të mos bëjë lëshime në raport me Listën Serbe, vetëm që ta kalojë këtë marrëveshje, njofton Klan Kosova.
“Ne jemi popull evropian dhe e meritojmë të jemi të lirë, optimist jam dhe do të jem gjithmonë, por e kam parë edhe në media të huaja që edhe po të ratifikohej marrëveshja e demarkacionit, liberalizimi i vizave prapë do të ishte vonuar. Kryeministri vetëm e ka trashëguar këtë marrëveshje, kjo marrëveshje është ratifikuaar kur ai ka qenë në opozitë. Kryeministri Mustafa sot gjendet në një pozitë jo të lehtë. Më mirë sot kish qenë me vendos në Kuvend dhe të votohej edhe ish përfunduar kjo çështje. Kërkoj nga Qeveria e Kosovës të mos bëjë koncesione me Listën Serbe, pasi jemi duke ia humbur kuptimin shtetit tonë”. /klankosova.tv
