Në vitin 1990, pas suprimimit të autonomisë së Kosovës, nisin demonstratat për të drejtat shqiptare. Fotografi i agjencisë Gamma, francezi Georges Merillon (1957), realizoi për mediat e huaja një reportazh nga Kosova që do të prek zemrat e njerëzve kudo në botë.
Në janar 1990, gjatë demonstratave në Rahovec, nga forcat e Sllobodan Millosheviqit vritet Nasim Elshani.
Merillon regjistroi momentin e vajtimit, pranë trupit të tij të vdekur. Me këtë fotografi, ai më 1991 fiton çmimin prestigjioz World Press Photo
“Një pikturë? Jo, fotografi. Dhimbja kur humbin të afërmin, e kapur në përjetësi. Trishtim rreth një trupi të pajetë. Historia e kësaj familjeje pasqyron historinë e një vendi”, ka thënë ai 25 vite më vonë, për foton e realizuar më 28 janar 1990.
“Pakkush ka mundur ta gjente Kosovën në hartë atëherë”, shtoi Merillon, transmeton Telegrafi.
Pranë trupit të ndjerë të Nasimit gjendet nëna e tij Sabrije, motra e vogël Afërdita, dhe ajo më e madhe Ryva.
Një ditë më parë Nasimi kishte shkuar në Rahovec, ku kishte demonstrata. Demonstruesit ranë në grackë të policëve serbë, që shtinë në turmat paqësore pa paralajmërim.
Merillon arriti në Nagafc me ndihmën e një gazetari shqiptar. Populli ishte mbledhur në qendër të fshatit, të trishtuar nga vrasja. Ata u habitën nga prezenca e gazetarëve, ndaj i ftuan në shtëpinë e familjes elshani.
“Qëndrova disa minuta në mes të grave, një orë në fshat e pastaj shkova në Prishtinë para se të niste ora policore”, thotë ai, duke shtuar se në ato çaste me të ishte edhe një gazetar i France 2 që ka marrë pamje nga kjo skenë morti.
