Përdorimi i laserëve ndriçues në drejtim të aeroplanëve është shtuar në Kosovë. Efekti negativ i gjithë kësaj është rreziku i verbërimit të përkohshëm të pilotëve.
Këto drita në treg shiten me qëllimin që të shënjohen yjet gjatë natës, por disa njerëz po i keqpërdorin, me gjithë faktin se mund të ndikojnë në humbjen e përkohshme të shikimit.
Fenomeni i drejtimit të dritës laserike, drejt aeroplanëve nga toka, është një fenomen në rritje, këtë e konfirmojnë edhe zyrtarë të aeroportit “Adem Jashari” dhe Aviacioni Civil i Kosovës.
Në vitin 2012, Autoriteti i Aviacionit Civil të Kosovës, në bashkëpunim me Policinë e Kosovës, ka përpiluar një qarkore udhëzuese mbi raportimin e rasteve të drejtimit të rrezeve laser drejt aeroplanëve në fluturim.
Driton Ujkani, zyrtar për media në Aeroportin Ndërkombëtar “Adem Jashari”, i ka thënë gazetës “Zëri”, se muajt e fundit është rritur numri i rasteve të drejtimit të dritës laserike në drejtim të aeroplanëve.
Ndër të tjera Ujkani ka thënë se rastin e kanë paraqitur tek Autoriteti i Aviacionit Civil, dhe në Policinë e Kosovës.
“Me qëllim të luftimit të këtij fenomeni, janë marrë hapa konkretë, ku tanimë kemi një memorandum bashkëpunimi në mes të Autoritetit të Aviacionit Civil, Policisë së Kosovës dhe Aeroportit Ndërkombëtar të Prishtinës – Kontrolli Ajror “Adem Jashari”. ANP-KA “Adem Jashari”, me rastin e marrjes së informatës nga ana e pilotëve për sulm me dritë laseri drejt fluturakes, rastin e ka paraqitur në Policinë e Kosovës, si dhe tek Autoriteti i Aviacionit Civil të Kosovës”, ka thënë Ujkani.
Ujkani drejtimin e dritës laserike drejt aeroplanëve e sheh si fenomen mjaft shqetësues, pasi që targetimi i qëllimshëm i pilotëve me dritë laseri largon vëmendjen e tyre nga funksionimi i sigurt i avionit “Avionët janë më të rrezikuar gjatë fazave kritike të fluturimit – fazës së ngritjes dhe asaj të aterrimit, kur pilotët duhet të kenë përqendrim maksimal. Çdo humbje e vëmendjes së pilotëve gjatë këtyre fazave është e rrezikshme. Një rreze e vetme laserike mund të shpërndahet përmes reflektimit të xhamit të përparmë të kabinës duke ndriçuar tërë kabinën. Një avion në fazën e aterrimit ka rreth një minutë kohë para se të arrijë pragun e pistës dhe të aterrojë. Një pilot i shpërqendruar nga një dritë laseri mund të verbohet deri në 10 sekonda duke rezultuar me një të parë të dëmtuar për më shumë se një minutë. Prandaj, rreziqet për udhëtarët dhe ekuipazhin janë mëse evidente, ka shtuar Ujkani.
Ndërsa, zyrtarë të Aviacionit Civil, për gazetën “Zëri”, kanë thënë se AAC-ja në bashkëpunim me Policinë e Kosovës kanë zhvilluar procedurat për parandalimin e këtij fenomeni.
“Në vitin 2013, AAC-ja në bashkëpunim me Policinë e Kosovës dhe ANP “Adem Jashari” – Kontrolli Ajror kanë zhvilluar një procedurë reagimi për rastet e tilla, e cila mundëson reagimet e Policisë brenda pak minutash në vendin e identifikuar të burimit të rrezes laser që i është drejtuar një aeroplani. Gjithashtu, gjatë gushtit të vitit të kaluar dhe këtë vit, AAC-ja së bashku me Policinë e Kosovës kanë nxjerrë komunikata të përbashkëta. Përmes këtyre komunikatave kemi njoftuar qytetarët rreth rrezikut të rrezeve laser për sigurinë e fluturimeve dhe se këto veprime janë të dënueshme sipas Kodit Penal të Republikës së Kosovës”.
Drejtimi i rrezeve laser në aeroplanë të cilët janë në fazën e aterrimit apo ngritjes është një fenomen në rritje si në Kosovë, ashtu edhe në Evropë. Kjo vjen si pasojë e qasjes së lehtë në këto pajisje, të cilat janë në dispozicion në treg. /Zëri/
