Nicolas Jackson (24) nuk do të transferohet nga Chelsea te Bayern edhe pse klubet ranë dakord për një huazim njëvjeçar me mundësi blerjeje, për të cilin Bayern do të paguante deri në 15 milionë euro.

Bavarezët gjithashtu do të kishin një mundësi për të blerë sulmuesin senegalez për 80 milionë, por asgjë nuk do të dalë nga e gjithë marrëveshja, sipas The Athletic.

Chelsea e ka informuar Bayernin se nuk do ta vazhdojë huazimin dhe lojtarit i është kërkuar të kthehet në Londër pas dëmtimit të Liam Delap.

Delap pësoi një dëmtim në kofshë në fitoren e së shtunës kundër Fulham, dhe trajneri Enzo Maresca tha menjëherë pas ndeshjes se pret që sulmuesi të mungojë deri në tetë javë, raporton KosovaPress.

Jackson mbërriti sot në Munih për të nënshkruar kontratën. Fabrizio Romano më parë postoi një foto të Jackson dhe ekipit të tij nga avioni që udhëtoi për në Gjermani. Marrëveshja duhej të shpallej brenda 24 orëve të ardhshme.

Huazimi i Jackson duhej të ishte i katërti më i shtrenjtë në historinë e futbollit dhe i dyti kur merren parasysh vetëm huazimet e rëna dakord për një sezon.

Juventus i pagoi Atletico Madridit më shumë për një huazim kur sollën Alvaro Moratën në një marrëveshje dyvjeçare në vitin 2020 për 20 milionë euro.

Kur bëhet fjalë për huazimet njëvjeçare, rekordi do të mbetet me Giovani Lo Celso. Tottenham pagoi 16 milionë euro te Real Betis në vitin 2019, përpara se ta blinte atë për 32 milionë euro.

Jackson iu bashkua Chelsea nga Villarreal dy vjet më parë për 37 milionë euro. Ai shënoi 30 gola në 81 paraqitje, por e ka humbur vendin e tij në formacionin titullar këtë sezon për shkak të mbërritjeve të Joao Pedro dhe Liam Delap. Ai vjen te Bayern si një njeri që mund të zëvendësojë Harry Kane.