Një ngjarje e rëndë ka ndodhur ditën e djeshme në Greqi, ku një 50-vjeçar ka vrarë kunatin e tij pasi dyshohet se ai prej vitesh i ka përdhunuar vajzën.
Mëngjesin e djeshëm vajza i ka treguar të atit për tmerrin që ajo përjetoi nga daja i saj, 33-vjeçari Erjon Pelivani, duke thënë se ai e shantazhonte me video që të mos tregonte asgjë.
50-vjeçari ka marrë pushkën e gjahut dhe me pretendimin se makina e tij ka pësuar dëmtime mekanike, ka pritur viktimën në një rrugë.
Aty pasi kanë debatuar ashpër, 50-vjeçari e ka ekzekutuar me një plumb në kokë dhe më pas është dorëzuar në Polici.
Njëkohësisht, bashkëshortja e autorit dhe motra e viktimës , në deklarata tregon se 18-vjeçarja nuk kishte përmendur asgjë për përdhunimet.
Në të njëjtën kohë, ajo tha se nuk kishte kuptuar asgjë, pasi vëllai i saj nuk e kishte lënë kurrë që të dyshonte për aktet e rënda.
Bashkëshortja e 50-vjeçarit Fatmir Tarellari, ishte njerka e 18-vjeçares.
“Këtë ngjarje e kam mësuar 3-4 ditë më parë. Nuk dija gjë, ai po e mbulonte. As vajza nuk më tha gjë. Burri e mori vesh dhe pasi kreu krimin më mori në telefon dhe më tha; “Të vrava vëllanë”, thotë ajo e tronditur.
