Presidenti amerikan, Barack Obama, dhe ai kuban, Raul Castro, mbrëmjen e së premtes vonë, janë përshëndetur me shtrëngim duarsh në Samitin amerikan në Panama.
Në një fotografi shihen Obama dhe Castro duke biseduar në një grup të vogël të liderëve, në ceremoninë e hapjes së samitit në qytetin e Panamasë.
Një zyrtar i Shtëpisë së Bardhë ka konfirmuar se Obama dhe Castro janë përshëndetur me shtrëngim duarsh dhe kanë biseduar për një kohë të shkurtër.
“Ky ishte një takim joformal dhe aty nuk kishte ndonjë fjalë të rëndësishme ndërmjet dy liderëve”, tha ky zyrtar.
Duke folur në Samitin amerikan në qytetin e Panamasë, presidenti amerikan, është shprehur edhe për raportet ndërmjet Shteteve të Bashkuara dhe Kubës.
“Derisa Shtetet e Bashkuara e fillojnë një kaptinë të re në raportet tona me Kubën, ne shpresojmë se kjo do të krijojë një ambient, i cili e përmirëson jetën e popullit kuban”.
“Kjo, jo për arsye se ishte imponuar nga ne, pra nga Shtetet e Bashkuara, por nëpërmjet të talentit, mençurisë, aspiratave dhe bisedimeve në mesin e kubanëve, nga të gjitha aspektet e jetës. Pra, ata mund të vendosin se cili është kursi më i mirë për prosperitet”, tha Barack Obama, duke shtuar se:
“Ne kemi respekt për dallimet ndërmjet dy vendeve tona. Ditët, në të cilat agjenda jonë në këtë hemisferë shpeshherë supozohej se mund të ndërhynte e pandëshkuar, pra këto ditë janë e kaluar”.
Në muajin dhjetor të vitit të kaluar, Barack Obama dhe Raul Castro, i patën shpallur planet për ripërtëritjen e marrëdhënieve diplomatike ndërmjet dy vendeve.
Njëherësh, sekretari amerikan i Shtetit, John Kerry, është takuar me ministrin e Jashtëm kuban, Bruno Rodriguez, në një takim të mbyllur në Qytetin e Panamasë, që ishte takimi i parë ndërmjet dy diplomatëve më të lartë të dy vendeve prej vitit 1958.
Një zyrtar i lartë i Departamentit Amerikan të Shtetit tha se ky ishte një “diskutim i gjatë dhe shumë konstruktiv” dhe se është bërë progres.
Presidenti i Kolumbisë, Jaun Manuel Santos, e lavdëroi shtytjen e Obamës për t’i përmirësuar raportet me Kubën, duke thënë se kjo do të ndihmojë për ta shëruar “plagën”.
Por, disidenti kuban, Guillermo Farinas, theksoi se grupet civile në Kubë ishin lënë anash nga bisedimet dhe i kanë bërë thirrje presidentit Obama, që ta mbështesë kërkesën e tyre për më tepër demokraci.
“Qeveria e Kiubës nuk po tregon vullnet të mirë… ata nuk dëshirojnë të bëjnë asnjë lloj të koncesionit”, i tha Farinas agjencisë Reuters.
Presidenti Obama duket se është afër që Kubën e udhëhequr nga komunistët, ta largoj nga lista e Shteteve të Bashkuara të vendeve për të cilat thuhet se e sponsorizojnë terrorizmin.
Departamenti Amerikan i Shtetit ka rekomanduar që Kuba të largohet nga lista terroriste, njoftoi një ndihmës në Komitetin për Marrëdhënie të Jashtme në Senatin amerikan.
Përfshirja e Kubës në këtë listë, në mënyrë automatike e sjell një varg të sanksioneve amerikane dhe Kuba po insiston që të largohet nga kjo listë, si kusht për ripërtëritjen e lidhjeve diplomatike.
Duke mos i marrë parasysh disa takime joformale, liderët amerikanë dhe ata kubanë nuk kanë pasur ndonjë takim të rëndësishëm prej vitit 1959, kur Fidel Castro, vëllai i presidentit Raul Castro, dhe ish-lider shumëvjeçar i Kubës, e pati përmbysur diktatorin Fulgencio Batista, që mbështetej nga Shtetet e Bashkuara.
