Shqiptarët te Kroi i Vitakut në Mitrovicë ia kanë ndalur punën serbëve që janë duke ndërtuar në këtë lagje.
Ata fillimisht kanë bllokuar rrugën në shenjë proteste për sulmin që serbët i kanë bërë një punëtori sot në mëngjes derisa po tentohej të nisen punimet për rindërtimin e shtëpive të shqiptarëve në këtë lagje.
Banorët pastaj i janë afruar punëtorëve serbë duke iu thënë të ndërprenë edhe ata punën.
Ramadan Istrefi pronar i shtëpisë, ka treguar për KTV-në se ata tashmë kanë edhe një vendim të MMPH-së, sipas të cilit për shtëpitë e djegura në luftë, nuk duhet leje.
“Serbët na i kanë djeg shtëpitë e tash po na pengojnë t’i ndërtojmë. Sot jemi dal të punojmë në shtëpinë time, kur kemi hy në oborr kanë ardh dy fqinj, njani edhe e kanë sulmu me gurë punëtorin edhe ekskavatorin”, ka thënë Istrefi.
Kjo është përpjekja e parë për rindërtim të shtëpive të shqiptarëve në veri që nga viti i kaluar, kur edhe atëherë u penguan nga serbët.
