Një polic dyshohet se ka ndërhyrë për të komprometuar hetimin e njërës nga aferat më të mëdha të korrupsionit në Kosovë, ku dyshohet se i janë shkaktuar 53 milionë euro dëm buxhetit të Kosovës pas dështimit për të përmbushur obligimet ndaj kompanisë “Bechtel & Enka”, që ndërtoi autostradën “Arbën Xhaferi”, shkruan sot Koha Ditore.
Burime të “Kohës Ditore” brenda hetuesisë kanë thënë se për mosintervistimin e një personi në këtë rast ka ndërhyrë polici i Drejtorisë së Krimeve Ekonomike, Fadil Haliti. Policia e Kosovës ka thënë që këtë rast e ka proceduar te Inspektorati Policor, ndërkohë që IPK-ja ka konfirmuar që tashmë ka nisur hetimet ndaj këtij polici.
Ani pse në fazën kur ka ndërhyrë, sipas këtij burimi, nuk ka qenë ende e përcaktuar cilësia e të ftuarve- nëse do të deklaroheshin si të dyshuar apo dëshmitarë, ky hetues ka ndikuar tek hetuesit e Task-Forcës Kundër Korrupsionit që një zyrtar publik qeveritar i lartë të mos intervistohej fare në asnjë cilësi.
Për këto dyshime për ndërhyrje nga ky zyrtar policor, sipas këtij burimi, janë informuar drejtori i përgjithshëm i Policisë se Kosovës, Rashit Qalaj, dhe shefi i hetimeve në këtë institucion, Riza Shillova.
Qalaj nuk u është përgjigjur telefonatave të gazetës.
